نیشنل ڈیزاسٹر مینجمنٹ اتھارٹی نے پاکستان بھر میں ہنگامی حالات سے نمٹنے کی صلاحیتوں کو بہتر بنانے اور مربوط حکمت عملی کے تحت پہلی مرتبہ ملک گیر سرچ اینڈ ریسکیو مشقوں کا انعقاد کیا ہے۔ ان مشقوں کا بنیادی مقصد مون سون کے دوران سیلاب، زلزلے اور دیگر قدرتی آفات کے پیش نظر بروقت انتباہی نظام اور ریسکیو آپریشنز کو مزید موثر بنانا ہے۔
اسلام آباد میں قائم نیشنل ایمرجنسی آپریشن سینٹر میں منعقدہ اس مشق کے دوران مختلف وفاقی و صوبائی اداروں بشمول ریسکیو 1122، سول ڈیفنس اور مسلح افواج کے اہلکاروں نے حصہ لیا۔ ان مشقوں کا اہتمام انسار فریم ورک کے تحت کیا گیا جس میں گلگت بلتستان میں گلیشیئرز پگھلنے سے بننے والی جھیلوں کے پھٹنے، مختلف علاقوں میں سیلابی صورتحال اور اسلام آباد و مظفرآباد میں زلزلے جیسے ہنگامی حالات کو فرضی طور پر تخلیق کیا گیا۔
حکام کے مطابق اس مشق کا مقصد ڈیزاسٹر مینجمنٹ کے نظام میں موجود خامیوں کی نشاندہی کرنا اور ریسکیو اداروں کے درمیان باہمی رابطہ کاری کو بہتر بنانا ہے۔ مشق کے دوران جدید موسماتی پیش گوئی، سیٹلائٹ ڈیٹا کے استعمال اور فوری معلومات کی فراہمی کے طریقہ کار کا عملی جائزہ لیا گیا۔
این ڈی ایم اے کے چیئرمین نے اس موقع پر زور دیا کہ قدرتی آفات سے ہونے والے نقصانات کو کم کرنے کے لیے ایک مربوط کمانڈ سسٹم ناگزیر ہے۔ انہوں نے مقامی رضاکاروں کے کردار کو سراہتے ہوئے کہا کہ عوام تک بروقت معلومات کی ترسیل کے لیے نیشنل ایمرجنسی آپریشن سینٹر کو مزید مستحکم کیا جائے گا۔
حکام نے اس عزم کا اعادہ کیا ہے کہ مستقبل میں بھی اس طرح کی مشقیں قومی حکمت عملی کا مستقل حصہ رہیں گی تاکہ کسی بھی ہنگامی صورتحال میں فوری اور مربوط ردعمل کو یقینی بنایا جا سکے۔
