خیبر پختونخوا کے ضلع شانگلہ میں قراقرم ہائی وے پر پیش آنے والے ایک افسوسناک ٹریفک حادثے کے نتیجے میں 11 افراد زخمی ہو گئے۔ حادثہ جمعہ کی شب پیش آیا۔
ریسکیو 1122 شانگلہ کے ڈسٹرکٹ ایمرجنسی آفیسر انجینئر ملک شیر دل خان کے مطابق یہ واقعہ مائرہ کے قریب پیش آیا، جس کی بنیادی وجہ شاہراہ پر کم بصارت بتائی جا رہی ہے۔
ابتدائی اطلاعات کے مطابق حادثہ ایک کار اور مسافر وین کے درمیان ٹکر کے باعث پیش آیا جس میں متعدد افراد شدید زخمی ہوئے۔
مقامی رہائشیوں، پولیس اور ریسکیو ٹیموں نے فوری طور پر امدادی کارروائیوں کا آغاز کیا۔ ریسکیو 1122 کے اہلکاروں نے جائے وقوعہ پر پہنچ کر زخمیوں کو ابتدائی طبی امداد فراہم کی اور انہیں قریبی طبی مراکز منتقل کیا۔
تمام زخمیوں کو پہلے مائرہ کے بنیادی مرکز صحت منتقل کیا گیا، تاہم زخموں کی نوعیت سنگین ہونے کے باعث آٹھ شدید زخمیوں کو بعد ازاں طبی امداد کے لیے ایبٹ آباد کے ایوب میڈیکل کمپلیکس منتقل کر دیا گیا۔
مقامی عینی شاہدین کا کہنا ہے کہ کیری وین میں سوار مسافروں کا تعلق آزاد جموں و کشمیر سے تھا، جبکہ کار میں سوار افراد کا تعلق شانگلہ کے علاقوں بشام اور چکسر سے بتایا جاتا ہے۔
