انتظامیہ اسلام آباد نے وفاقی دارالحکومت میں پبلک اور گڈز ٹرانسپورٹ کی آمدورفت کی اجازت دے دی ہے جبکہ کاروباری اوقات کے حوالے سے نیا نوٹیفکیشن جاری کر دیا گیا ہے۔ حکام کے مطابق فیض آباد بس ٹرمینل کے علاوہ شہر کے تمام بس اڈے کھول دیے گئے ہیں، فیض آباد ٹرمینل تاحکم ثانی بند رہے گا۔
شہریوں کی تفریح کے لیے دامن کوہ اور لیک ویو پارک سمیت تمام پبلک پارکس اور ہائیکنگ ٹریلز کو بھی عوام کے لیے کھول دیا گیا ہے۔
ڈپٹی کمشنر اسلام آباد عرفان نواز میمن کی جانب سے جاری کردہ نوٹیفکیشن کے مطابق شہر بھر کی تمام دکانیں، مارکیٹیں اور شاپنگ مالز رات آٹھ بجے بند کر دیے جائیں گے۔ ہوٹلز، ریستوران، فوڈ آؤٹ لیٹس، تندور اور کریانہ اسٹورز رات دس بجے تک کھلے رہ سکیں گے، تاہم ان مقامات پر ٹیک اوے اور ہوم ڈلیوری سروسز پر کوئی پابندی نہیں ہوگی۔
شادی ہالز، مارکیز اور دیگر تقریبات کے مقامات کے لیے بھی رات دس بجے کا وقت مقرر کیا گیا ہے، یہ پابندی نجی تقریبات پر بھی لاگو ہوگی۔ اسپورٹس کمپلیکس اور جم اب رات دس بجے تک کھلے رہ سکیں گے، جن کے اوقات کار میں دو گھنٹے کی توسیع کی گئی ہے۔ ادویات کی دکانیں، ہسپتال، پیٹرول پمپس اور ڈیری کی دکانیں ان پابندیوں سے مستثنیٰ ہوں گی۔ نئے اوقات کار کا اطلاق 25 اپریل سے ہو چکا ہے جو تاحکم ثانی نافذ رہیں گے۔
دوسری جانب ڈپٹی کمشنر راولپنڈی حسن وقار چیمہ نے اعلان کیا ہے کہ راولپنڈی کے تمام داخلی اور خارجی راستے ہر قسم کی ٹریفک کے لیے کھول دیے گئے ہیں، تاہم پیرودہائی جنرل بس اسٹینڈ تاحکم ثانی بند رہے گا۔
