صدر مملکت آصف علی زرداری اور وزیراعظم شہباز شریف نے عالمی یوم مزدور کے موقع پر جاری کردہ اپنے الگ الگ پیغامات میں کاروباری برادری اور صنعت کاروں پر زور دیا ہے کہ وہ ملکی لیبر فورس کے وقار اور تحفظ کو یقینی بنائیں۔ انہوں نے کہا کہ جو قوم اپنے مزدوروں کا تحفظ کرتی ہے وہ دراصل اپنے مستقبل کو محفوظ بناتی ہے اور لیبر ایمپاورمنٹ ہی پائیدار قومی ترقی کا واحد راستہ ہے۔
صدر آصف علی زرداری نے اپنے پیغام میں کہا کہ پاکستان بین الاقوامی لیبر معیارات کی پاسداری اور کام کی جگہوں پر بنیادی حقوق کے فروغ کے لیے پرعزم ہے۔ ان حقوق میں منصفانہ اجرت، سماجی تحفظ، جبری اور چائلڈ لیبر کا خاتمہ اور عدم امتیاز شامل ہیں۔ انہوں نے مزدوروں کو معیشت کی بنیاد قرار دیتے ہوئے 1973 کے آئین کے اس عہد کو دہرایا جس کے تحت ہر قسم کے استحصال کا خاتمہ لازمی ہے۔
وزیراعظم شہباز شریف نے کہا کہ ملک کے اندر اور بیرونِ ملک کام کرنے والی پاکستانی لیبر فورس ہماری قومی صلاحیت، محنت اور پیشہ ورانہ مہارت کی عکاس ہے۔ انہوں نے کہا کہ ایمپلائز اولڈ ایج بینیفٹس انسٹی ٹیوشن اور ورکرز ویلفیئر فنڈ سمیت قومی ادارے مزدوروں اور ان کے خاندانوں کو پنشن، رہائش اور تعلیم جیسی بنیادی سہولیات فراہم کرنے کے لیے کوشاں ہیں۔
پاکستان پیپلز پارٹی کے چیئرمین بلاول بھٹو زرداری نے کہا کہ مزدور قوم کی اصل طاقت ہیں اور عالمی یوم مزدور ان کی قربانیوں کو خراجِ تحسین پیش کرنے کا دن ہے۔ انہوں نے ایک منصفانہ پاکستان کے قیام کے لیے مزدوروں کے حقوق کے تحفظ اور ان کی فلاح و بہبود کو ناگزیر قرار دیا۔
پیپلز پارٹی ویمن ونگ کی صدر فریال تالپور نے مزدوروں کو قومی ترقی کا ستون قرار دیا جبکہ وزیراعلیٰ سندھ سید مراد علی شاہ نے کہا کہ صوبائی حکومت کم از کم اجرت کے قوانین پر عمل درآمد کو یقینی بنا رہی ہے۔ صوبائی وزیر شرجیل انعام میمن اور وزیر بلدیات ناصر حسین شاہ نے بھی اپنے پیغامات میں مزدوروں کی خدمات کو سراہتے ہوئے کہا کہ ان کی بہبود حکومت کی اولین ترجیح ہے۔
مرکزی ترجمان پیپلز پارٹی شازیہ مری نے کہا کہ مزدور ترقی کے حقیقی محرک ہیں اور ایک متوازن معاشرے کے قیام کے لیے ان کی معاشی خودمختاری انتہائی ضروری ہے۔ انہوں نے اس عزم کا اعادہ کیا کہ پیپلز پارٹی معاشی انصاف اور مساوی مواقع فراہم کرنے کے لیے اپنی جدوجہد جاری رکھے گی۔
