اسلام آباد میں چیئرمین سینیٹ سید یوسف رضا گیلانی اور پاکستان میں تعینات جمہوریہ قازقستان کے سفیر یرژان کستافین کے مابین اہم ملاقات ہوئی ہے۔ اس نشست میں دونوں ممالک نے سیاسی و پارلیمانی تعاون، تجارتی و اقتصادی روابط اور علاقائی رابطوں کو مزید مستحکم کرنے پر اتفاق کیا ہے۔
چیئرمین سینیٹ نے قازق سفیر کا خیرمقدم کرتے ہوئے پاک قازق تعلقات کو مضبوط بنانے میں ان کی فعال کوششوں کو سراہا۔ انہوں نے اس عزم کا اعادہ کیا کہ پاکستان قازقستان کے ساتھ اپنے دیرینہ اور دوستانہ تعلقات کو انتہائی اہمیت دیتا ہے، جن کی بنیاد باہمی احترام، مشترکہ اقدار اور علاقائی امن و خوشحالی کے یکساں ویژن پر استوار ہے۔
سفیر یرژان کستافین نے علاقائی امن اور مواصلاتی رابطوں کے فروغ میں پاکستان کے تعمیری کردار کی تعریف کی۔ انہوں نے اس بات کا اعادہ کیا کہ قازقستان پاکستان کے ساتھ مختلف شعبوں میں دوطرفہ تعاون کے دائرہ کار کو مزید وسیع کرنے کا خواہشمند ہے۔
