اسلام آباد میں ون کانسٹی ٹیوشن ایونیو کے معاملات کا جائزہ لینے کے لیے قائم کردہ خصوصی کمیٹی کا پہلا اجلاس وفاقی وزیر قانون اعظم نذیر تارڑ کی زیر صدارت منعقد ہوا۔ اجلاس میں وزیر مملکت برائے داخلہ طلال چوہدری سمیت دیگر اعلیٰ حکام نے شرکت کی۔
کمیٹی نے چیئرمین کیپٹل ڈویلپمنٹ اتھارٹی سہیل اشرف اور ممبر اسٹیٹ زمان وٹو سے ون کانسٹی ٹیوشن ایونیو کے حوالے سے تفصیلی بریفنگ طلب کی۔ اجلاس میں سی ڈی اے حکام نے منصوبے کے حقائق کمیٹی کے سامنے پیش کیے۔
وفاقی وزیر قانون اعظم نذیر تارڑ نے شرکاء کو بتایا کہ سی ڈی اے کی جانب سے بریفنگ مکمل ہونے کے بعد ون کانسٹی ٹیوشن ایونیو سے متاثرہ افراد کے نمائندوں کا موقف بھی سنا جائے گا۔ انہوں نے واضح کیا کہ کمیٹی اسلام آباد ہائی کورٹ کے تحریری فیصلے کو مدنظر رکھتے ہوئے تمام قانونی اور تکنیکی پہلوؤں کا بغور جائزہ لے گی۔
کمیٹی میں سیکرٹری کیبنٹ ڈویژن اور سیکرٹری تجارت بھی بطور ممبر شریک ہوئے۔ کمیٹی نے سی ڈی اے سے منگل کے روز مزید بریفنگ طلب کر لی ہے اور اس عزم کا اظہار کیا ہے کہ رپورٹ جلد از جلد مکمل کر کے وزیراعظم کو پیش کی جائے گی۔
