پاکستان اور قطر کا مشرقِ وسطیٰ میں قیامِ امن کی کوششوں کو تیز کرنے پر اتفاق

وزیراعظم محمد شہباز شریف اور قطر کے وزیراعظم شیخ محمد بن عبدالرحمن بن جاسم الثانی کے درمیان ٹیلی فونک رابطہ ہوا ہے جس میں خطے کی موجودہ صورتحال پر تفصیلی تبادلہ خیال کیا گیا۔ دونوں رہنماؤں نے امریکہ اور ایران کے درمیان جاری کشیدگی کے تناظر میں خطے میں پائیدار امن کے قیام کے لیے اپنی کوششیں جاری رکھنے کے عزم کا اعادہ کیا۔

وزیراعظم شہباز شریف نے اپنے قطری ہم منصب سے گفتگو کرتے ہوئے کہا کہ انہیں شیخ محمد بن عبدالرحمن سے بات کر کے خوشی ہوئی۔ وزیراعظم نے 16 اپریل کو اپنے دورہ دوحہ کا حوالہ دیتے ہوئے کہا کہ امیرِ قطر شیخ تمیم بن حمد الثانی اور دیگر قطری قیادت کے ساتھ ان کی ملاقاتیں خطے میں امن کی کوششوں پر اتفاق رائے پیدا کرنے کے لیے انتہائی سودمند ثابت ہوئیں۔

وزیراعظم شہباز شریف نے اس امید کا اظہار کیا کہ پاکستانی عوام امیرِ قطر کے جلد دورہ پاکستان کے منتظر ہیں، جس سے دونوں ممالک کے درمیان دوطرفہ تعلقات مزید مستحکم اور گہرے ہوں گے۔

قطری وزیراعظم نے خطے میں امن و استحکام کے لیے پاکستان کی مسلسل کوششوں کو سراہتے ہوئے اس عزم کا اظہار کیا کہ قطر مشرق وسطیٰ میں سکیورٹی اور استحکام یقینی بنانے کے لیے پاکستان کی قیادت میں جاری سفارتی کوششوں کی حمایت جاری رکھے گا۔

دونوں رہنماؤں نے باہمی دلچسپی کے تمام امور پر قریبی رابطے اور ہم آہنگی برقرار رکھنے پر اتفاق کیا۔