راولپنڈی میں جی ایچ کیو کے مقام پر ہفتے کی صبح ایک پروقار تقریب کا انعقاد کیا جا رہا ہے جس میں معرکہ حق کی فتح کو ایک سال مکمل ہونے پر پاک فوج کی اعلیٰ قیادت شرکت کرے گی۔ یہ تقریب صبح آٹھ بج کر چالیس منٹ پر شروع ہوگی جس میں ملک کے عسکری کمانڈرز عزم و ہمت کا اظہار کرتے ہوئے شہدا کو خراج عقیدت پیش کریں گے۔
تقریب کے مہمان خصوصی چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر ہوں گے۔ تقریب میں شرکت کرنے والوں میں چیف آف ایئر اسٹاف ایئر مارشل ظہیر احمد بابر سدھو اور چیف آف نیول اسٹاف ایڈمرل نوید اشرف سمیت دیگر اعلیٰ عسکری حکام شامل ہوں گے۔
تینوں مسلح افواج کے سربراہان یادگار شہدا پر پھول چڑھائیں گے اور وطن کے دفاع میں جانوں کا نذرانہ پیش کرنے والوں کو خراج عقیدت پیش کریں گے۔ اس موقع پر تینوں مسلح افواج کے چاق و چوبند دستے سلامی پیش کریں گے۔
فیلڈ مارشل سید عاصم منیر تقریب سے خطاب بھی کریں گے جس کے ذریعے پاکستان کی عسکری صلاحیتوں اور دفاعی تیاریوں کا اعادہ کیا جائے گا۔ حکام کا کہنا ہے کہ یوم معرکہ حق اس بات کی یاد دہانی ہے کہ ملک کے خلاف کسی بھی جارحیت کا بھرپور اور فیصلہ کن جواب دیا جائے گا۔
تقریب کے دوران تینوں مسلح افواج کے سربراہان کی موجودگی ملکی دفاع اور اداروں کے مابین ہم آہنگی کا پیغام دے گی۔ اس اعلیٰ سطحی تقریب کے پیش نظر جی ایچ کیو اور اس کے گردونواح میں سیکیورٹی کے سخت انتظامات کیے گئے ہیں جبکہ قانون نافذ کرنے والے ادارے اور عسکری حکام سیکیورٹی کی نگرانی کر رہے ہیں۔
