لاہور کے لیڈی ولنگٹن ہسپتال میں آپریشن تھیٹر کے دوران سی سیکشن آپریشن کرنے کا مقابلہ کرنے والی چار لیڈی ڈاکٹروں کو معطل کر دیا گیا ہے۔ سوشل میڈیا پر وائرل ہونے والی ویڈیو میں ڈاکٹرز کو اس بات پر مذاق کرتے ہوئے دیکھا جا سکتا ہے کہ کون پہلے سرجری مکمل کرے گا جس کے بعد طبی اخلاقیات اور مریض کے تقدس کی پامالی پر شدید تشویش کا اظہار کیا جا رہا ہے۔
محکمہ صحت پنجاب نے واقعے کا نوٹس لیتے ہوئے گائنی ڈیپارٹمنٹ کی سربراہ کو شوکاز نوٹس جاری کر دیا ہے جبکہ میڈیکل سپرنٹنڈنٹ سے واقعے پر باقاعدہ وضاحت طلب کر لی گئی ہے۔ جن ڈاکٹرز کی پوسٹ گریجویٹ ٹریننگ معطل کی گئی ہے ان میں ڈاکٹر فاطمہ طور، ڈاکٹر ماہم امین، ڈاکٹر زینب طاہر اور ڈاکٹر عائشہ افضل شامل ہیں۔
صوبائی وزیر صحت خواجہ سلمان رفیق نے واقعے کی شدید مذمت کرتے ہوئے کہا کہ یہ عمل طبی اخلاقیات کے منافی اور مریض کے وقار کے خلاف ہے۔ ان کا کہنا تھا کہ پیشہ ورانہ معیارات کی ایسی خلاف ورزی کسی صورت قابل قبول نہیں ہے۔
سیکرٹری صحت پنجاب عظمت محمود نے واضح کیا ہے کہ مقررہ وقت کے اندر تسلی بخش جواب نہ ملنے کی صورت میں ذمہ داران کے خلاف مزید سخت کارروائی عمل میں لائی جائے گی۔ شوکاز نوٹس میں کہا گیا ہے کہ ڈاکٹروں کا یہ رویہ مریضوں کی حفاظت کے معیارات اور طبی پیشے کے تقدس کے منافی ہے۔ حکام کے مطابق یہ واقعہ کلینیکل فرائض کی انجام دہی میں غفلت اور ہسپتال کے پروٹوکولز کی سنگین خلاف ورزی کو ظاہر کرتا ہے۔
