ایرانی پاسداران انقلاب نے آبنائے ہرمز پر اپنے مکمل کنٹرول اور سخت نگرانی کا اعلان کر دیا ہے۔ سرکاری نشریاتی ادارے آئی آر آئی بی کے مطابق پاسداران انقلاب کی مشترکہ عسکری کمان نے اپنے بیان میں کہا ہے کہ امریکی پابندیوں اور ایرانی بندرگاہوں پر ناکہ بندی کے جواب میں آبنائے ہرمز کی صورتحال کو سابقہ پوزیشن پر بحال کر دیا گیا ہے۔
ایرانی عسکری حکام نے امریکہ پر الزام عائد کیا ہے کہ وہ ناکہ بندی کے بہانے بحری قزاقی اور چوری جیسی کارروائیوں میں ملوث ہے۔ بیان میں واضح کیا گیا ہے کہ یہ اہم ترین تجارتی آبی گزرگاہ اب ایرانی مسلح افواج کے سخت انتظام اور کنٹرول میں ہے۔
پاسداران انقلاب کا کہنا ہے کہ جب تک واشنگٹن کی جانب سے ایرانی بندرگاہوں کی طرف آنے اور جانے والے جہازوں کے لیے مکمل بحری آزادی بحال نہیں کی جاتی، تب تک آبنائے ہرمز پر یہ سخت کنٹرول برقرار رہے گا۔
عالمی تیل کی ترسیل کے لیے انتہائی اہم سمجھے جانے والے اس آبی راستے پر پیدا ہونے والی تازہ صورتحال خطے میں جاری کشیدگی میں مزید اضافے کا پیش خیمہ ثابت ہو سکتی ہے۔
