دبئی پولیس نے بین الاقوامی جرائم میں ملوث آئرلینڈ کے ایک مطلوب ملزم کو گرفتار کر لیا ہے۔ قانون نافذ کرنے والے اداروں کے ذرائع نے تصدیق کی ہے کہ گرفتار ہونے والا شخص ڈینیل کیناہن ہے، جس پر منظم جرائم پیشہ گروہ چلانے کے الزامات ہیں۔
دبئی پولیس نے جمعہ کے روز جاری کردہ بیان میں بتایا کہ آئرلینڈ کی حکومت سے عدالتی دستاویزات موصول ہونے کے بعد بدھ کے روز ایک کارروائی کی گئی جس کے نتیجے میں مطلوب ملزم کو حراست میں لیا گیا۔ تاہم حکام نے ابتدائی طور پر ملزم کے نام کا براہ راست ذکر نہیں کیا تھا۔
امریکی حکومت نے سن 2022 میں ڈینیل کیناہن کو کیناہن آرگنائزڈ کرائم گروپ کے تین مرکزی رہنماؤں میں شمار کیا تھا اور اس کی گرفتاری میں مدد دینے والے کے لیے 50 لاکھ ڈالر انعام کا اعلان کیا تھا۔ امریکی محکمہ خزانہ نے اس گروہ کا موازنہ دنیا کے خطرناک ترین مجرمانہ نیٹ ورکس سے کرتے ہوئے کہا تھا کہ یہ گروہ دبئی کو اپنی غیر قانونی سرگرمیوں کے مرکز کے طور پر استعمال کرتا ہے۔
آئرش ٹائمز کی رپورٹ کے مطابق ڈینیل کیناہن پر عائد الزامات کا تعلق آئرلینڈ میں جاری گینگ لینڈ دشمنی اور پرتشدد واقعات سے ہے۔
دوسری جانب 2021 میں ڈینیل کیناہن کے وکیل نے بی بی سی سے گفتگو کرتے ہوئے ان تمام الزامات کو مسترد کیا تھا۔ وکیل کا موقف تھا کہ ان کے موکل کا کوئی مجرمانہ ریکارڈ نہیں ہے اور انہیں گینگ کا سربراہ قرار دینا بے بنیاد ہے۔ خبر رساں ادارے رائٹرز کی جانب سے اس معاملے پر ردعمل جاننے کے لیے کیناہن کے نمائندوں سے رابطے کی کوشش کی گئی تاہم کوئی جواب موصول نہیں ہوا۔
