وزیر اعظم شہباز شریف سعودی عرب، قطر اور ترکی کے کامیاب دورے مکمل کرنے کے بعد انطالیہ سے پاکستان کے لیے روانہ ہو گئے۔ انطالیہ ایئرپورٹ پر ترک حکام نے وزیر اعظم اور ان کے وفد کو الوداع کہا۔
رخصتی کے موقع پر ایئرپورٹ پر موجود اہم شخصیات میں ترک وزارت خارجہ کے ڈائریکٹر جنرل سفیر ٹولگا برمک، سفیر نیلوفر کاگسز، رکن پارلیمنٹ برہان کایاتورک اور ترکی میں پاکستان کے سفیر ڈاکٹر یوسف جنید شامل تھے۔
تین روزہ دورے کے دوران وزیر اعظم نے تینوں برادر ممالک کی قیادت کے ساتھ اعلیٰ سطح کے مذاکرات کیے۔ انہوں نے انطالیہ ڈپلومیسی فورم کے موقع پر عالمی رہنماؤں سے بھی ملاقاتیں کیں جن میں باہمی تعلقات کے استحکام، علاقائی امن اور عالمی امور پر تبادلہ خیال کیا گیا۔
وزیر اعظم کے ہمراہ جانے والے وفد میں نائب وزیر اعظم اور وزیر خارجہ اسحاق ڈار، وزیر اطلاعات و نشریات عطا اللہ تارڑ، معاون خصوصی سید طارق فاطمی اور وزیر اعظم کے کوآرڈینیٹر برائے غیر ملکی میڈیا مشرف زیدی شامل تھے۔
نائب وزیر اعظم اسحاق ڈار نے دورے کو انتہائی نتیجہ خیز قرار دیتے ہوئے کہا کہ سعودی عرب اور قطر کے دورے مختلف شعبوں میں تعاون بڑھانے کے لیے نہایت اہم ثابت ہوئے۔ انہوں نے مزید بتایا کہ انطالیہ فورم کے دوران وزیر اعظم شہباز شریف اور ترک صدر رجب طیب اردوان کے مابین بھی ملاقات ہوئی۔
اسحاق ڈار نے انطالیہ ڈپلومیسی فورم کو امن و استحکام کے فروغ کے لیے ایک اہم عالمی پلیٹ فارم قرار دیا۔ انہوں نے ترک قیادت بالخصوص وزیر خارجہ ہاکان فیدان کی جانب سے فورم کے کامیاب انعقاد اور پرتپاک میزبانی پر شکریہ ادا کیا۔
