بیروت سے موصولہ اطلاعات کے مطابق لبنانی صدر جوزف عون نے واضح کیا ہے کہ اسرائیل کے ساتھ لبنان کے مذاکرات کا ایران سے متعلق صورتحال سے کوئی تعلق نہیں ہے۔ انہوں نے کہا کہ لبنان کی درخواست پر ڈونلڈ ٹرمپ کی مداخلت نے جنگ بندی کی راہ ہموار کی اور مذاکرات کے آغاز میں کلیدی کردار ادا کیا۔
صدر عون نے مزید کہا کہ جنگ بندی کو برقرار رکھنے کے لیے ڈونلڈ ٹرمپ کے ساتھ رابطے بدستور جاری ہیں۔ انہوں نے اعلان کیا کہ اسرائیل کے ساتھ ہونے والے مذاکرات کی قیادت سابق سفیر سائمن کرم کریں گے جو اس سے قبل امریکہ میں لبنان کے سفیر کے فرائض سرانجام دے چکے ہیں۔
واضح رہے کہ لبنان اس تنازعے میں دو مارچ کو اس وقت شامل ہوا جب ایران حمایت یافتہ گروپ حزب اللہ نے اسرائیل پر حملے شروع کیے۔ حزب اللہ کے مطابق یہ کارروائیاں ایران کے سپریم لیڈر علی خامنہ ای کی ہلاکت کے ردعمل میں کی گئیں جنہیں مبینہ طور پر تنازع کے پہلے روز یعنی اٹھائیس فروری کو اسرائیل نے نشانہ بنایا تھا۔
دوسری جانب اسرائیل پر نومبر دو ہزار چوبیس میں طے پانے والے جنگ بندی معاہدے کی بار بار خلاف ورزی کرنے کے الزامات بھی عائد کیے گئے ہیں۔ لبنان میں جاری اسرائیلی فضائی حملوں کے نتیجے میں اب تک دو ہزار سے زائد افراد ہلاک اور دس لاکھ سے زیادہ شہری بے گھر ہو چکے ہیں۔ اس کے علاوہ جنوبی لبنان میں اسرائیلی فوجی کی جانب سے صلیب کی بے حرمتی کے واقعے کی بھی شدید مذمت کی گئی ہے۔
