کابینہ ڈویژن نے اسلام آباد کے ریڈ زون میں واقع تمام وفاقی دفاتر کے لیے 22 اپریل کو ورک فرام ہوم کا حکم جاری کر دیا ہے۔
حکام کے مطابق ریڈ زون میں قائم تمام وزارتوں، ڈویژنز اور سرکاری محکموں کے دفاتر بند نہیں ہوں گے بلکہ دفتری امور کا عمل آن لائن اور رہائش گاہوں سے جاری رہے گا۔
تمام افسران اور سیکریٹریٹ کے عملے کو ہدایت کی گئی ہے کہ وہ اپنے اسٹیشنز پر موجود رہیں اور آن کال رہیں۔ حکام نے واضح کیا ہے کہ ضرورت پڑنے پر کسی بھی وقت ملازمین کو فوری طور پر دفتر طلب کیا جا سکتا ہے۔
اس حوالے سے باقاعدہ نوٹیفکیشن جاری کر دیا گیا ہے جس میں متعلقہ اداروں کو ہدایت کی گئی ہے کہ وہ میڈیا کے ذریعے عوام کو ورکنگ کے اس نئے طریقہ کار سے آگاہ کریں۔
