لندن میں ٹین ڈاؤننگ اسٹریٹ کے قریب ایران مخالف جنگی مظاہرے کے دوران چاقو زنی کا افسوسناک واقعہ پیش آیا ہے جس کے نتیجے میں متعدد افراد زخمی ہو گئے۔ غیر ملکی میڈیا کے مطابق مظاہرے میں ہزاروں افراد شریک تھے کہ اچانک نامعلوم افراد نے حملہ کر دیا۔ پولیس نے فوری طور پر علاقے کو گھیرے میں لے کر متعدد مشتبہ افراد کو حراست میں لے لیا ہے جبکہ زخمیوں کو طبی امداد فراہم کی جا رہی ہے۔
دوسری جانب امریکی صدر ڈونلڈ ٹرمپ نے کہا ہے کہ ایران کے ساتھ جنگ بندی میں توسیع کے لیے کوئی حتمی ڈیڈ لائن مقرر نہیں کی گئی ہے۔ فوکس نیوز کے مطابق صدر ٹرمپ کا کہنا ہے کہ وہ تنازع کے خاتمے میں کوئی جلد بازی نہیں دکھا رہے اور ان کا مقصد ایک مضبوط اور جامع معاہدہ طے کرنا ہے۔
صدر ٹرمپ نے مزید کہا کہ انہوں نے فوج کو ناکہ بندی برقرار رکھنے اور ہر ممکن صورتحال کے لیے تیار رہنے کی ہدایت کر رکھی ہے۔ انہوں نے واضح کیا کہ جنگ بندی اس وقت تک جاری رہے گی جب تک ایران کی جانب سے ٹھوس تجاویز سامنے نہیں آتیں۔ ان کے مطابق ایران کے ساتھ مذاکرات کا دوسرا دور جمعہ کو متوقع ہے جسے وہ ایک مثبت پیش رفت قرار دے رہے ہیں۔
وائٹ ہاؤس کی پریس سیکریٹری کیرولین لیوٹ نے میڈیا کو بریفنگ دیتے ہوئے ان خبروں کی تردید کی ہے جن میں جنگ بندی میں تین سے پانچ دن کی توسیع کا دعویٰ کیا گیا تھا۔ انہوں نے کہا کہ صدر ٹرمپ نے کوئی ڈیڈ لائن طے نہیں کی، وہ بحری ناکہ بندی سے مطمئن ہیں اور ان کا ماننا ہے کہ ایران اس وقت کمزور پوزیشن میں ہے۔
