امریکی صدر ڈونلڈ ٹرمپ جمعرات کو لبنانی اور اسرائیلی نمائندوں کے ساتھ امن مذاکرات کے ایک نئے دور کی میزبانی کریں گے جس کا بنیادی مقصد لبنان میں جاری غیر مستحکم جنگ بندی میں توسیع کرنا ہے۔ یہ مذاکرات پہلے محکمہ خارجہ میں طے تھے تاہم اب انہیں وائٹ ہاؤس منتقل کر دیا گیا ہے جس کی قیادت وزیر خارجہ مارکو روبیو کریں گے۔ امریکی حکام کے مطابق صدر ٹرمپ خود مہمانوں کا استقبال کریں گے۔
لبنانی صدر جوزف عون نے واضح کیا ہے کہ بیروت انتظامیہ ایک ماہ کے لیے جنگ بندی میں توسیع کی درخواست کرے گی۔ اس توسیع میں رہائشی مکانات کی تباہی روکنے، شہریوں، عبادت گاہوں، صحافیوں اور طبی و تعلیمی شعبوں پر حملے بند کرنے کی ضمانتیں شامل ہوں گی۔ صدر عون نے اس امید کا اظہار کیا کہ وہ جلد واشنگٹن کا دورہ کر کے صدر ٹرمپ سے ملاقات کریں گے۔ تاہم انہوں نے نیتن یاہو کے ساتھ ٹیلی فونک رابطے کی تردید کی ہے۔
اسرائیلی حکام نے مذاکرات سے قبل بیان دیا ہے کہ انہیں لبنانی حکومت سے کوئی سنجیدہ اختلافات نہیں ہیں اور وہ حزب اللہ کے خلاف مل کر کام کرنے کے خواہاں ہیں۔ واضح رہے کہ حزب اللہ ان مذاکرات میں شریک نہیں ہے اور اس کی مخالفت کر رہی ہے۔ امریکی وفد میں اسرائیل میں تعینات امریکی سفیر مائیک ہکابی بھی شامل ہوں گے۔
اسرائیلی جارحیت کے نتیجے میں اب تک 2450 سے زائد لبنانی شہری جاں بحق اور دس لاکھ بے گھر ہو چکے ہیں۔ بدھ کے روز بھی اسرائیلی فضائی حملوں میں ایک صحافی عمل خلیل سمیت پانچ افراد ہلاک ہوئے۔ اسرائیل کا دعویٰ ہے کہ وہ جنگ بندی کے باوجود اپنے اہداف کے خلاف کارروائی کا حق محفوظ رکھتا ہے، جبکہ حزب اللہ نے جنوبی لبنان میں اسرائیلی فوجیوں پر حملوں اور ڈرون مار گرانے کا دعویٰ کیا ہے۔
اسرائیلی وزیر خارجہ گیڈون سار نے امن کی راہ میں واحد رکاوٹ حزب اللہ کو قرار دیا ہے۔ دوسری جانب ایران نے واشنگٹن کے ساتھ مستقل جنگ بندی کے مذاکرات کے لیے لبنان میں جنگ بندی کو لازمی شرط قرار دیا تھا۔ ایران امریکی بحری ناکہ بندی کے باعث اس ہفتے ہونے والے مذاکرات میں شریک نہیں ہوا، تاہم صدر ٹرمپ نے ایران کے ساتھ جنگ بندی میں غیر معینہ مدت کے لیے توسیع کر دی ہے۔
