وفاقی وزیر برائے موسمیاتی تبدیلی ڈاکٹر مصدق ملک نے کہا ہے کہ حکومت کم آمدنی والے طبقے کو ریلیف فراہم کرنے کے لیے موٹر سائیکل اور رکشہ مالکان کو پیٹرولیم سبسڈی دے رہی ہے۔ ایک نجی ٹی وی چینل سے گفتگو کرتے ہوئے انہوں نے کہا کہ وفاقی حکومت کے خصوصی اقدامات کے باعث بڑے شہروں میں عوام مفت بس سروس سے بھی استفادہ کر رہے ہیں۔
پیٹرولیم سپلائی چین کے بارے میں پوچھے گئے ایک سوال کے جواب میں ڈاکٹر مصدق ملک نے واضح کیا کہ سپلائی کے نظام میں کوئی تعطل نہیں ہے اور اس کا سہرا وزارت پیٹرولیم کے سر جاتا ہے۔
امریکہ اور ایران کے درمیان کشیدگی پر تبصرہ کرتے ہوئے وفاقی وزیر نے کہا کہ پاکستان کی قیادت نے مذاکرات کے عمل کو آسان بنانے کے لیے مخلصانہ کوششیں کی ہیں اور ملک خطے میں امن کا خواہاں ہے۔ انہوں نے مزید کہا کہ دونوں ممالک کے مابین جنگ عالمی معیشت کو نقصان پہنچا رہی ہے اور ترقی کی راہ میں رکاوٹیں کھڑی کر رہی ہے۔
مصدق ملک نے اس عزم کا اعادہ کیا کہ ملکی معیشت کو مستحکم کرنے اور برآمدات میں اضافے کے لیے ہر ممکن کوششیں کی جا رہی ہیں۔
