وزیر اعظم شہباز شریف مئی کے مہینے میں چین کا سرکاری دورہ کریں گے جس کا مقصد دونوں ممالک کے درمیان اعلیٰ سطحی رابطوں کو تیز کرنا اور معاشی تعاون کو مزید مستحکم بنانا ہے۔
سرکاری ذرائع کے مطابق اس دورے کے دوران وزیر اعظم چینی قیادت کے ساتھ اہم ملاقاتیں کریں گے جن میں دوطرفہ تعلقات، تجارتی امور اور سرمایہ کاری کے مواقع پر تفصیلی تبادلہ خیال کیا جائے گا۔
چین پاکستان اقتصادی راہداری یعنی سی پیک کی پیش رفت اس دورے کے ایجنڈے کا مرکزی حصہ ہوگی۔ اس کے علاوہ نئے معاہدوں کو حتمی شکل دینے اور چین سے مزید سرمایہ کاری کے حصول کے لیے بھی کوششیں کی جائیں گی۔
ملاقاتوں میں علاقائی اور عالمی صورتحال پر بھی گفتگو متوقع ہے۔ پاکستان کی جانب سے چینی حکام کو مشرق وسطیٰ کی بدلتی ہوئی صورتحال کے ساتھ ساتھ امریکہ اور ایران کے درمیان جاری کشیدگی پر بریفنگ دی جائے گی۔
دفتر خارجہ کی جانب سے وزیر اعظم کے دورہ چین کے لیے سفارتی تیاریاں جاری ہیں اور حکام دورے کے شیڈول اور مصروفیات کو حتمی شکل دینے میں مصروف ہیں۔
