نائب وزیراعظم اور وزیر خارجہ سینیٹر محمد اسحاق ڈار نے یورپی یونین کی نائب صدر اور ہائی ریپریزنٹیٹو کایا کالاس سے ٹیلی فونک رابطہ کیا ہے۔ اس گفتگو کے دوران خطے کی بدلتی ہوئی صورتحال اور اس کے معاشی و وسیع تر اثرات پر تبادلہ خیال کیا گیا۔
یورپی یونین کی نائب صدر نے خطے میں امن و استحکام کے فروغ کے لیے پاکستان کے مسلسل تعمیری اور سہولت کار کردار کو سراہا۔ اس موقع پر نائب وزیراعظم اسحاق ڈار نے علاقائی امن کے حوالے سے پاکستان کے پختہ عزم کا اعادہ کرتے ہوئے کہا کہ پاکستان بات چیت اور تعاون کے فروغ کے لیے پرعزم ہے۔
اسحاق ڈار نے اسلام آباد میں یورپی یونین۔پاکستان بزنس فورم کے حالیہ کامیاب انعقاد کو خوش آئند قرار دیا۔ انہوں نے کہا کہ اس طرح کے فورمز باہمی شراکت داری کو مضبوط بنانے اور کاروباری برادری کے لیے نئے مواقع تلاش کرنے میں کلیدی کردار ادا کر رہے ہیں۔
دونوں رہنماؤں نے مستقبل میں بھی قریبی رابطے برقرار رکھنے پر اتفاق کیا ہے۔
