صدر مملکت آصف علی زرداری نے مزدوروں کے عالمی دن کے موقع پر اپنے پیغام میں محنت کشوں کو خراج تحسین پیش کیا ہے۔ انہوں نے اس عزم کا اعادہ کیا ہے کہ وفاقی حکومت مزدوروں کے حقوق کے تحفظ، منصفانہ اجرت کی فراہمی اور کام کے باوقار ماحول کو یقینی بنانے کے لیے پرعزم ہے۔
صدر مملکت نے کہا کہ یکم مئی کا دن ان مزدوروں کی تاریخی جدوجہد کی یاد دلاتا ہے جنہوں نے اپنے بنیادی حقوق اور کام کے اوقات کے تعین کے لیے جانوں کا نذرانہ پیش کیا۔ انہوں نے 140 سال قبل شکاگو کی تحریک کا ذکر کرتے ہوئے کہا کہ آٹھ گھنٹے کام، آٹھ گھنٹے آرام اور آٹھ گھنٹے ذاتی زندگی کا مطالبہ انسانی وقار کے اصولوں کی بنیاد بنا۔
آصف علی زرداری نے آئین پاکستان 1973 کا حوالہ دیتے ہوئے کہا کہ ریاست ہر قسم کے استحصال کے خاتمے اور منصفانہ معاشی اصولوں کے قیام کی پابند ہے۔ انہوں نے زراعت سے لے کر صنعت تک ملکی ترقی میں محنت کشوں کے کردار کو سراہتے ہوئے کہا کہ ان کی لگن ہی قومی معیشت کی اصل طاقت ہے۔
صدر مملکت نے بین الاقوامی لیبر آرگنائزیشن کے کنونشنز کے مطابق پاکستان کے عزم کو دہرایا جس میں جبری اور چائلڈ لیبر کا خاتمہ، مساوات اور سماجی تحفظ شامل ہیں۔ انہوں نے بیرون ملک مقیم پاکستانیوں کی خدمات کو بھی سراہا جو ترسیلات زر کے ذریعے ملکی معیشت میں اہم کردار ادا کر رہے ہیں۔
انہوں نے کہا کہ انسانی سرمائے میں سرمایہ کاری، تکنیکی اور ووکیشنل تعلیم کا فروغ اور افرادی قوت میں خواتین کی شمولیت حکومت کی اولین ترجیحات ہیں۔ صدر نے اس بات پر زور دیا کہ مزدوروں، آجروں اور ٹریڈ یونینز کو مل کر ایک ایسے معاشی نظام کی تشکیل کرنی چاہیے جو انصاف اور وقار پر مبنی ہو۔
اپنے پیغام کے آخر میں صدر آصف علی زرداری نے کہا کہ جو قوم اپنے مزدوروں کا تحفظ کرتی ہے وہ اپنے مستقبل کو محفوظ بناتی ہے، اور پائیدار قومی ترقی کے لیے لیبر ایمپاورمنٹ ناگزیر ہے۔
