وزیراعلیٰ سندھ سید مراد علی شاہ اور پاکستان میں تعینات ڈنمارک کی سفیر مایا ڈیروس مورٹنسن کے درمیان کراچی میں اہم ملاقات ہوئی جس میں دوطرفہ تعاون اور صوبے میں سرمایہ کاری کے مواقع پر تفصیلی تبادلہ خیال کیا گیا۔
ملاقات کے دوران وزیراعلیٰ سندھ نے ڈینش سفیر کو صوبے میں سرمایہ کاری کے وسیع مواقع سے آگاہ کیا۔ ڈنمارک کی سفیر نے سندھ حکومت کے ترقیاتی ویژن میں گہری دلچسپی کا اظہار کرتے ہوئے ماحولیاتی تحفظ اور کلین انرجی کے فروغ پر زور دیا۔
سید مراد علی شاہ نے کہا کہ سندھ حکومت صوبے بھر میں سستی بجلی کی فراہمی کے منصوبوں پر کام کر رہی ہے جس سے عوام کو ریلیف ملے گا اور صنعتی ترقی کی رفتار تیز ہوگی۔ ملاقات میں ونڈ انرجی کے منصوبوں میں سرمایہ کاری کے امکانات کا بھی جائزہ لیا گیا۔
دونوں رہنماؤں نے ساحلی ترقی بالخصوص کیٹی بندر کے منصوبے پر تفصیلی بات چیت کی۔ وزیراعلیٰ نے کہا کہ کیٹی بندر تاریخی اہمیت کا حامل علاقہ ہے جسے جدید پورٹ کے طور پر تیار کرنے کا عزم رکھتے ہیں۔
سید مراد علی شاہ نے مزید کہا کہ کیٹی بندر پورٹ کی تعمیر سے کراچی کی بندرگاہوں پر دباؤ کم ہوگا اور یہ مستقبل میں ایک اہم اقتصادی مرکز ثابت ہوگا۔ ڈینش سفیر نے کیٹی بندر منصوبے کو علاقائی تجارت کے فروغ کے لیے انتہائی اہم قرار دیا۔
