روہیلاں والی کی گلی میں ایک خاتون نے نیم بے ہوشی کی حالت میں بچے کو جنم دیا، جس کے بعد ریسکیو 1122 کی ٹیم نے ہنگامی بنیادوں پر کارروائی کرتے ہوئے ماں اور بچے کی جان بچائی۔
ریسکیو حکام کے مطابق امدادی ٹیم کو اطلاع موصول ہونے پر ایمبولینس فوری طور پر جائے وقوعہ پر پہنچی تاہم ریسکیو اہلکاروں کے پہنچنے تک خاتون کو دردِ زہ شروع ہو چکا تھا۔
ریسکیو عملے نے مقامی خواتین کی مدد سے موقع پر ہی کامیاب ڈیلیوری کروائی۔ عملے نے فوری طبی امداد فراہم کرتے ہوئے نومولود کی سانسیں بحال کیں، جس کے بعد ماں اور بچے کو ابتدائی طبی امداد دی گئی۔
ریسکیو حکام نے خاتون کی شناخت شازیہ بی بی کے نام سے کی ہے۔ طبی ماہرین کے مطابق ماں اور بچہ دونوں کی حالت خطرے سے باہر اور مستحکم ہے۔
