انڈونیشیا کے جزیرے ہلماہیرا میں واقع کوہ ڈوکونو آتش فشاں کے اچانک پھٹنے سے تین کوہ پیما ہلاک ہو گئے۔ حکام کے مطابق ہلاک ہونے والوں میں دو سنگاپوری شہری اور ایک مقامی فرد شامل ہے، جبکہ دیگر چند افراد تاحال لاپتہ ہیں۔
شمالی ہلماہیرا کے پولیس چیف ایرلکسن پاساریبو نے مامویا گاؤں میں میڈیا کو بریفنگ دیتے ہوئے بتایا کہ حادثے کے وقت پہاڑ کی ڈھلوانوں پر کل بیس کوہ پیما موجود تھے جن میں نو کا تعلق سنگاپور سے تھا جبکہ باقی انڈونیشی شہری تھے۔
آتش فشاں پھٹنے کے بعد راکھ کا ایک بڑا بادل فضا میں چھ کلومیٹر کی بلندی تک بلند ہوا، تاہم خوش قسمتی سے قریبی دیہات اور قصبے اس زد میں نہیں آئے۔ پولیس کے مطابق اب تک پندرہ کوہ پیما بحفاظت نیچے اتر آئے ہیں جن میں سے کچھ معمولی زخمی ہوئے جنہیں طبی امداد کے لیے ہسپتال منتقل کر دیا گیا ہے۔
ایرلکسن پاساریبو نے مزید بتایا کہ ہلاک ہونے والوں کی لاشیں تاحال پہاڑ پر موجود ہیں اور لاپتہ افراد کی تلاش کے لیے فوری طور پر ریسکیو آپریشن شروع نہیں کیا جا سکا ہے۔ آتش فشاں سے وقفے وقفے سے جاری لاوا اور راکھ کے اخراج کے باعث صورتحال انتہائی خطرناک ہے، اس لیے مشترکہ امدادی ٹیمیں محفوظ موقع ملنے کا انتظار کر رہی ہیں۔
پولیس چیف نے واضح کیا کہ کوہ پیماؤں کے گروپ کو ممنوعہ علاقے میں لے جانے پر گائیڈ اور پورٹر کو حراست میں لے لیا گیا ہے اور ان کے خلاف قانونی کارروائی کی جا سکتی ہے۔
واضح رہے کہ انڈونیشیا بحر الکاہل کے رنگ آف فائر پر واقع ہونے کے باعث زلزلوں اور آتش فشاں پھٹنے جیسے قدرتی آفات کا مرکز رہتا ہے۔
