چیف آف ڈیفنس فورسز اور آرمی اسٹاف فیلڈ مارشل سید عاصم منیر اتوار کی صبح راولپنڈی میں جنرل ہیڈ کوارٹرز میں منعقدہ ایک خصوصی تقریب کی قیادت کریں گے۔ یہ تقریب گزشتہ برس بھارت کے خلاف حاصل ہونے والی کامیابی یعنی معرکہ حق کی پہلی سالگرہ کے موقع پر منعقد کی جا رہی ہے۔
معرکہ حق کا آغاز 22 اپریل 2025 کو پہلگام حملے کے بعد ہوا تھا جو 10 مئی کو آپریشن بنیان مرصوص کے نتیجے میں جنگ بندی پر منتج ہوا۔ ریڈیو پاکستان کے مطابق تقریب کے مہمان خصوصی فیلڈ مارشل سید عاصم منیر ہوں گے جبکہ فضائیہ کے سربراہ ایئر چیف مارشل ظہیر احمد بابر سدھو اور نیول چیف ایڈمرل نوید اشرف بھی شرکت کریں گے۔ یادگار شہدا پر پھول چڑھانے کے بعد تینوں مسلح افواج کے دستے سلامی پیش کریں گے اور فیلڈ مارشل سید عاصم منیر شرکاء سے خطاب بھی کریں گے۔
صدر مملکت آصف علی زرداری نے معرکہ حق کی پہلی سالگرہ پر قوم اور مسلح افواج کو خراج تحسین پیش کیا ہے۔ ایوان صدر سے جاری بیان کے مطابق صدر نے فیلڈ مارشل عاصم منیر کی قیادت اور جرات مندانہ فیصلوں کو اس کامیابی کا محور قرار دیا۔ انہوں نے پاک فضائیہ کی پیشہ ورانہ مہارت اور نیول چیف سمیت بحری افواج کی آپریشنل تیاریوں کو قومی فخر کا باعث قرار دیا۔
صدر زرداری نے کہا کہ پاکستان ایک ذمہ دار اور امن پسند ملک ہے جس نے دشمن کی جارحیت کا بھرپور اور متوازن جواب دے کر دنیا پر اپنی دفاعی صلاحیت واضح کر دی ہے۔ انہوں نے زور دیا کہ مسئلہ جموں و کشمیر کا حل اقوام متحدہ کی قراردادوں کے مطابق ہونا چاہیے اور پاکستان کشمیریوں کی اخلاقی، سیاسی اور سفارتی حمایت جاری رکھے گا۔
بھارت کی جانب سے سندھ طاس معاہدے کی معطلی کو آبی جارحیت قرار دیتے ہوئے صدر نے کہا کہ پانی کروڑوں پاکستانیوں کے لیے زندگی کی حیثیت رکھتا ہے۔ افغانستان سے ہونے والی دہشت گردی پر بات کرتے ہوئے انہوں نے کہا کہ کابل کو یقینی بنانا ہوگا کہ اس کی سرزمین پاکستان یا کسی دوسرے ملک کے خلاف استعمال نہ ہو۔
صدر نے مزید کہا کہ وزیراعظم شہباز شریف اور فیلڈ مارشل عاصم منیر کی کاوشوں سے پاکستان خطے میں توازن اور استحکام کی علامت بن کر ابھرا ہے۔ ایران اور امریکہ کے درمیان کشیدگی کے خاتمے کے لیے پاکستان کی سفارتی کوششوں کو عالمی سطح پر سراہا گیا ہے۔
واضح رہے کہ 22 اپریل 2025 کو پہلگام حملے کے بعد بھارت نے سندھ طاس معاہدہ معطل کرنے، ویزے منسوخ کرنے اور واہگہ بارڈر بند کرنے جیسے جارحانہ اقدامات کیے تھے۔ 7 مئی کو بھارتی میزائل حملوں کے جواب میں پاکستان نے آپریشن بنیان مرصوص شروع کیا جس میں بھارتی تنصیبات کو نشانہ بنایا گیا۔ 10 مئی 2025 کو امریکی صدر ڈونلڈ ٹرمپ کے اعلان اور وزیر خارجہ اسحاق ڈار کی تصدیق کے بعد جنگ بندی عمل میں آئی تھی۔
