ای بے نے گیم اسٹاپ کی جانب سے 55 اعشاریہ 5 ارب ڈالر کی ٹیک اوور پیشکش کو مسترد کر دیا ہے۔ ای بے انتظامیہ نے اپنے بیان میں اس پیشکش کو ناقابل یقین اور غیر پرکشش قرار دیا ہے۔
یہ پیشکش ایک ہفتہ قبل گیم اسٹاپ کے سی ای او ریان کوہن کی جانب سے پیش کی گئی تھی۔ کوہن کا موقف تھا کہ گیم اسٹاپ کے 1600 آؤٹ لیٹس ای بے کے لیے توثیق، انٹیک اور ترسیل کے ایک قومی نیٹ ورک کے طور پر کام کر سکتے ہیں۔
ای بے کی جانب سے جاری کردہ اعلامیے میں کہا گیا ہے کہ یہ فیصلہ گیم اسٹاپ کی جانب سے حصول کے لیے درکار فنانسنگ میں غیر یقینی صورتحال کے باعث کیا گیا ہے۔ کمپنی کے مطابق دونوں اداروں کے انضمام سے پیدا ہونے والے آپریشنل خطرات اور مالیاتی بوجھ بھی اس انکار کی بڑی وجوہات ہیں۔
گیم اسٹاپ، جو پہلے ہی ای بے کے 5 فیصد حصص کا مالک ہے، نے 125 ڈالر فی شیئر نقد اور اسٹاک کی صورت میں پیشکش کی تھی۔ گیم اسٹاپ کی جانب سے اس فیصلے پر فوری طور پر کوئی ردعمل سامنے نہیں آیا ہے۔
مارکیٹ کیپٹلائزیشن کے اعتبار سے گیم اسٹاپ کی مالیت تقریباً 10 اعشاریہ 4 ارب ڈالر ہے، جبکہ ای بے کی قدر 48 ارب ڈالر کے لگ بھگ ہے۔ گیم اسٹاپ 2021 میں اس وقت سرخیوں میں آیا تھا جب ریڈٹ پر متحرک خوردہ سرمایہ کاروں کی جانب سے حصص کی خریداری کے بعد اس کے اسٹاک کی قیمت میں 2 ہزار فیصد سے زائد کا اضافہ ہوا تھا۔
