وفاقی وزیر اطلاعات عطا اللہ تارڑ نے کہا ہے کہ پاکستان فضائیہ نے معرکہ حق کے دوران اپنی پیشہ ورانہ مہارت اور برتری ثابت کی۔ اسلام آباد میں انسٹی ٹیوٹ آف اسٹریٹجک اسٹڈیز سے خطاب کرتے ہوئے انہوں نے کہا کہ بھارتی رافیل طیاروں کو مار گرانے کے عمل نے نہ صرف بھارت کا تکبر خاک میں ملایا بلکہ پاکستان کی مقامی دفاعی صلاحیتوں کا بھی لوہا منوایا۔
وزیر اطلاعات نے کہا کہ بھارت نے پاکستان پر جارحیت مسلط کی اور شہری آبادی کو نشانہ بنایا، جبکہ پاکستان نے اپنے ردعمل کو صرف فوجی اہداف تک محدود رکھا۔ انہوں نے واضح کیا کہ پاکستان ایک ذمہ دار ریاست ہے اور دہشت گردی کے خلاف جنگ میں فرنٹ لائن کا کردار ادا کر رہی ہے۔
عطا اللہ تارڑ نے کہا کہ معرکہ حق کے دوران پاکستان نے بیانیے، عسکری اور سفارتی محاذوں پر کامیابی حاصل کی۔ انہوں نے اس کامیابی کا سہرا قوم کے اتحاد، ریاستی اداروں اور چیف آف آرمی اسٹاف و چیف آف ڈیفنس فورسز فیلڈ مارشل عاصم منیر کی قیادت کو دیا۔
پہلگام واقعے پر بات کرتے ہوئے انہوں نے کہا کہ بھارت نے بغیر کسی تحقیقات کے دس منٹ میں ایف آئی آر درج کر کے پاکستان پر الزام تراشی کی۔ وزیراعظم شہباز شریف نے پاکستان ملٹری اکیڈمی کاکول میں کیڈٹس سے خطاب کے دوران شفاف تحقیقات کی پیشکش کی تھی، تاہم ایک سال گزرنے کے باوجود بھارت تحقیقات سے فرار اختیار کر رہا ہے۔
وزیر اطلاعات کا کہنا تھا کہ بھارت اپنے اندرونی مسائل کو بیرونی اور بیرونی مسائل کو اندرونی رنگ دینے کا عادی ہے۔ انہوں نے کہا کہ مقبوضہ جموں و کشمیر کا مسئلہ اقوام متحدہ کی قراردادوں کے تحت ایک بین الاقوامی تنازع ہے، جبکہ دہشت گردی بھارت کا اپنا اندرونی مسئلہ ہے۔ انہوں نے کلبھوشن یادیو کی گرفتاری کا حوالہ دیتے ہوئے کہا کہ جو ملک پاکستان پر الزامات لگاتا ہے، وہ خود کینیڈا سمیت دیگر ممالک میں سکھوں کے قتل میں ملوث پایا گیا ہے۔
انہوں نے کہا کہ پاکستان دہشت گردی کا مقابلہ کر رہا ہے جبکہ بھارت دہشت گردی کو فروغ دے رہا ہے۔ انہوں نے بھارتی میڈیا کے جھوٹے پروپیگنڈے کا ذکر کرتے ہوئے کہا کہ بھارتی میڈیا نے لاہور اور ملتان جیسے خشکی سے گھرے شہروں پر حملے کے مضحکہ خیز دعوے کیے۔
عطا اللہ تارڑ نے کہا کہ پاکستان نے دہشت گردی کے خلاف جنگ میں اربوں ڈالر کا نقصان اٹھایا اور بے مثال قربانیاں دیں۔ انہوں نے اس عزم کا اعادہ کیا کہ پاکستان کی عسکری اور سول قیادت ہر سطح پر ہم آہنگ ہے اور ملک کسی بھی جارحیت کا منہ توڑ جواب دینے کے لیے تیار ہے۔
واضح رہے کہ 22 اپریل کو پہلگام میں 26 افراد کی ہلاکت کے بعد بھارت نے بلاجواز پاکستان پر الزام عائد کیا تھا۔ اس کے بعد بھارت نے سندھ طاس معاہدہ معطل کرنے، ویزے منسوخ کرنے اور واہگہ اٹاری بارڈر بند کرنے جیسے جارحانہ اقدامات کیے۔ سات مئی کو بھارتی میزائل حملوں کے جواب میں پاکستان نے تین رافیل طیارے مار گرائے۔ دس مئی کو آپریشن بنیان مرصوص کے ذریعے پاکستان نے بھارتی فوجی تنصیبات کو نشانہ بنایا، جس کے بعد امریکی صدر ڈونلڈ ٹرمپ کی مداخلت سے جنگ بندی عمل میں آئی تھی۔
