نیویارک کے لا گارڈیا ایئرپورٹ پر ایئر کینیڈا ایکسپریس کا طیارہ لینڈنگ کے دوران فائر ٹرک سے ٹکرا گیا، جس کے نتیجے میں پائلٹ اور کو پائلٹ ہلاک ہو گئے۔ حالیہ برسوں میں پیش آنے والے عالمی فضائی حادثات کی تفصیلات درج ذیل ہیں۔
سال 2025 میں بھارت کے شہر احمد آباد سے لندن جانے والی ایئر انڈیا کی پرواز ٹیک آف کے چند منٹ بعد ہی گر کر تباہ ہو گئی، جس سے 242 مسافروں میں سے صرف ایک زندہ بچ سکا، جبکہ زمین پر موجود 19 افراد بھی ہلاک ہوئے۔ اسی سال نومبر میں امریکہ کے شہر لوئی ول میں یو پی ایس کا کارگو طیارہ گرنے سے سات افراد ہلاک اور 11 زخمی ہوئے۔ 29 جنوری کو واشنگٹن میں امریکن ایئر لائنز کا جیٹ طیارہ امریکی فوج کے بلیک ہاک ہیلی کاپٹر سے ٹکرا کر دریائے پوٹومیک میں گر گیا، جس سے 60 سے زائد افراد لقمہ اجل بن گئے۔
سال 2024 میں جنوبی کوریا کے موآن انٹرنیشنل ایئرپورٹ پر جیجو ایئر کی پرواز 7C2216 حادثے کا شکار ہوئی، جس میں 175 مسافروں سمیت 179 افراد ہلاک ہوئے۔ 25 دسمبر کو آذربائیجان ایئر لائنز کا طیارہ قازقستان میں گر کر تباہ ہوا جس میں 38 افراد جاں بحق ہوئے۔ آذربائیجان کے صدر الہام علیوف نے دعویٰ کیا کہ طیارے کو روس میں زمینی فائرنگ سے نشانہ بنایا گیا، تاہم ماسکو نے اس کی تصدیق نہیں کی۔ 2 جنوری کو جاپان کے ہنیڈا ایئرپورٹ پر جاپان ایئر لائنز کا طیارہ کوسٹ گارڈ کے طیارے سے ٹکرا گیا، جس سے کوسٹ گارڈ کے پانچ اہلکار ہلاک ہوئے جبکہ جاپان ایئر لائنز کے تمام 379 مسافر محفوظ رہے۔
سال 2022 میں چین کے صوبے گوانگشی کے پہاڑی علاقے میں چائنا ایسٹرن ایئر لائنز کا بوئنگ 737-800 طیارہ گرنے سے 132 افراد ہلاک ہوئے۔ یہ چین میں 28 برسوں کا بدترین فضائی حادثہ تھا۔
سال 2020 میں ایران کے پاسداران انقلاب نے تہران ایئرپورٹ سے اڑنے والی یوکرین انٹرنیشنل ایئر لائنز کی پرواز کو مار گرایا، جس میں 176 افراد ہلاک ہوئے۔ ایرانی حکام نے اس واقعے کو ریڈار کی خرابی اور آپریٹر کی غلطی قرار دیا تھا۔
سال 2019 میں ایتھوپیا ایئر لائنز کا بوئنگ 737 میکس 8 طیارہ ادیس ابابا سے نیروبی جاتے ہوئے گر کر تباہ ہوا، جس کے نتیجے میں 157 افراد ہلاک ہوئے، جس کے بعد دنیا بھر میں بوئنگ 737 میکس طیاروں کو گراؤنڈ کر دیا گیا تھا۔
سال 2018 میں انڈونیشیا کی لائن ایئر کا بوئنگ 737 میکس طیارہ جکارتہ سے اڑان بھرنے کے بعد جاوا سمندر میں گر گیا اور 189 افراد ہلاک ہو گئے۔
سال 2014 میں ملائیشیا ایئر لائنز کی پرواز ایم ایچ 17 کو مشرقی یوکرین کے اوپر مار گرایا گیا، جس میں 298 افراد ہلاک ہوئے۔ اسی سال 8 مارچ کو کوالالمپور سے بیجنگ جانے والی ملائیشیا ایئر لائنز کی پرواز ایم ایچ 370 لاپتہ ہو گئی، جس کا ملبہ اور 239 مسافروں کا تاحال کوئی سراغ نہیں مل سکا۔
