روس کے علاقے ولادیمیر میں یوکرین کے ڈرون حملے کے نتیجے میں ایک ہی خاندان کے تین افراد ہلاک ہو گئے۔ مقامی حکام اور گورنر الیگزینڈر آودیف کے مطابق رات کے اوقات میں ہونے والے اس حملے میں ایک 12 سالہ لڑکا اور اس کے والدین اپنے اپارٹمنٹ میں ہی دم توڑ گئے۔
حکام کا مزید کہنا ہے کہ واقعے میں ہلاک ہونے والے بچے کی 5 سالہ بہن معجزانہ طور پر بچ گئی ہے تاہم وہ شدید جھلس چکی ہے۔ متاثرہ بچی کو فوری طور پر ہسپتال منتقل کر دیا گیا ہے جہاں اسے طبی امداد فراہم کی جا رہی ہے۔
یہ ہولناک واقعہ ولادیمیر ریجن کے مغربی حصے میں واقع الیگزینڈرووسکی ڈسٹرکٹ میں پیش آیا۔ مقامی انتظامیہ کی جانب سے علاقے میں امدادی کارروائیاں مکمل کر لی گئی ہیں اور واقعے کی تحقیقات کا عمل جاری ہے۔
