بنگلہ دیشی پولیس نے منگل کے روز سابق اسپیکر قومی اسمبلی شیریں شرمین چوہدری کو اقدام قتل کے الزامات کے تحت گرفتار کر لیا ہے۔ یہ شیخ حسینہ واجد کی معزول حکومت کے کسی اہم رکن کی نئی منتخب حکومت کے دور میں پہلی گرفتاری ہے۔
شیریں شرمین چوہدری، جو جنوبی ایشیائی ملک کی پہلی خاتون اسپیکر ہونے کے ساتھ ساتھ شیخ حسینہ کی کابینہ میں وزیر بھی رہ چکی ہیں، انہیں ایک رشتہ دار کی رہائش گاہ سے حراست میں لیا گیا۔
ان کے وکیل شمیم السعید نے تمام الزامات کو مسترد کرتے ہوئے کہا ہے کہ اقدام قتل میں ان کی شمولیت کا دعویٰ مضحکہ خیز ہے۔ انہوں نے بتایا کہ عدالت نے ان کی ضمانت کی درخواست مسترد کر دی ہے۔
سن دو ہزار چوبیس میں ہونے والے مہلک عوامی احتجاج کے بعد سے شیریں شرمین چوہدری منظر عام سے غائب تھیں۔ وہ عوامی لیگ کے ان درجنوں ارکان میں شامل ہیں جنہیں حکومت کے خاتمے کے بعد مظاہرین کے خلاف کریک ڈاؤن کے مقدمات میں گرفتار کیا گیا ہے۔
عدالت میں تفتیشی حکام نے مؤقف اختیار کیا کہ شیریں شرمین چوہدری فیصلہ سازی میں کلیدی کردار ادا کرتی تھیں اور ان پر نہتے شہریوں پر حملوں کی منصوبہ بندی اور احکامات جاری کرنے کا الزام ہے۔
پولیس انسپکٹر محسن الدین نے عدالت کو بتایا کہ اٹھارہ جولائی دو ہزار چوبیس کو پولیس اور عوامی لیگ کے کارکنوں نے طلبہ اور دیگر مظاہرین پر فائرنگ کی تھی۔
بنگلہ دیش نیشنلسٹ پارٹی کے رہنما طارق رحمان نے فروری میں ہونے والے انتخابات میں بھاری کامیابی حاصل کی تھی اور اقتدار سنبھالا تھا۔ اس سے قبل عبوری حکومت نے ایک سو ستر ملین آبادی والے ملک کے معاملات چلائے تھے۔
سابق وزیراعظم شیخ حسینہ، جو اس وقت بھارت میں روپوش ہیں، ان کا نام بھی اسی مقدمے میں شامل کیا گیا ہے۔ اس پیش رفت سے ڈھاکا اور نئی دہلی کے درمیان تعلقات میں تناؤ پیدا ہوا ہے۔
دریں اثنا، بنگلہ دیش کے وزیر خارجہ خلیل الرحمان دو طرفہ تعلقات کو بہتر بنانے کے لیے منگل کے روز بھارت کے دورے پر روانہ ہو رہے ہیں۔
