نائجیریا کی ریاست بینیو میں مسلح افراد نے یونیورسٹی کے داخلہ امتحانات کے لیے جانے والے سیکنڈری اسکول کے طلباء اور دیگر مسافروں کو اغواء کر لیا ہے۔ یہ رواں برس اسکول کے طلباء کے اغواء کا پہلا واقعہ ہے۔
ریاست کے گورنر ہائیسنتھ عالیہ نے جمعرات کی شب واقعے کی تصدیق کرتے ہوئے اسے بزدلانہ کارروائی قرار دیا۔ حملہ مکوردی اوٹوکپو روڈ پر پیش آیا۔ اگرچہ حکام نے مغویوں کی حتمی تعداد نہیں بتائی تاہم مقامی میڈیا کے مطابق سترہ طلباء لاپتہ ہیں۔
گورنر ہائیسنتھ عالیہ نے اپنے بیان میں کہا کہ معصوم شہریوں بالخصوص امتحانات میں شرکت کے لیے جانے والے طلباء کو نشانہ بنانا ناقابل قبول ہے اور یہ انسانیت اور شہری نظم و ضبط کے تمام اصولوں کے منافی ہے۔
حکام نے تاحال اس واقعے کے ذمہ داروں کی نشاندہی نہیں کی ہے۔ سیکیورٹی اداروں کی جانب سے بازیابی کے لیے سرچ آپریشن شروع کر دیا گیا ہے اور گورنر نے ہدایت کی ہے کہ مغویوں کی بازیابی کے لیے کوئی کسر نہ چھوڑی جائے۔
نائجیریا میں مسلح گروہ اور شدت پسند اکثر مسافروں، اسکول کے بچوں اور دیہی آبادی کو نشانہ بناتے ہیں۔ حکومت کے بارہا دعووں کے باوجود اجتماعی اغواء کے واقعات جاری ہیں جس سے تعلیم، تجارت اور سفری نظام بری طرح متاثر ہو رہا ہے اور عوام حکومتی کارکردگی پر سوال اٹھا رہے ہیں۔
امریکی صدر ڈونلڈ ٹرمپ نے نائجیریا میں بدامنی کا حوالہ دیتے ہوئے اسے مسیحیوں پر ظلم قرار دیا ہے اور فوجی کارروائی کی دھمکی دی ہے۔ دوسری جانب نائجیریا کی حکومت کا موقف ہے کہ یہ بدامنی کسی ایک مذہب تک محدود نہیں بلکہ اس سے دونوں مذاہب کے پیروکار متاثر ہو رہے ہیں۔
