امریکی صدر ڈونلڈ ٹرمپ نے ایران کی جانب سے جنگ بندی کے دوران آبنائے ہرمز کو دوبارہ کھولنے کے اعلان کے بعد وزیراعظم شہباز شریف اور فیلڈ مارشل سید عاصم منیر کا شکریہ ادا کیا ہے۔
سماجی رابطے کی ویب سائٹ ٹروتھ سوشل پر جاری اپنے پیغامات میں صدر ٹرمپ نے اس پیش رفت کو دنیا کے لیے ایک عظیم دن قرار دیا اور امریکا اور ایران کے درمیان ثالثی میں پاکستان کی قیادت کے مرکزی کردار کی تعریف کی۔ انہوں نے وزیراعظم شہباز شریف اور فیلڈ مارشل عاصم منیر کو شاندار شخصیات قرار دیتے ہوئے ان کی کوششوں پر اظہار تشکر کیا۔
یہ پیش رفت ایرانی وزیر خارجہ عباس عراقچی کے اس بیان کے بعد سامنے آئی جس میں انہوں نے تصدیق کی کہ جنگ بندی کے باقی عرصے کے دوران یہ اہم آبی گزرگاہ تجارتی جہاز رانی کے لیے کھلی رہے گی۔ صدر ٹرمپ نے واضح کیا کہ آبنائے ہرمز کے کھلنے اور تجارتی سرگرمیوں کی بحالی کے باوجود ایران کے خلاف امریکی بحری ناکہ بندی برقرار رہے گی۔ انہوں نے کہا کہ ایرانی جہازوں پر پابندیاں اس وقت تک جاری رہیں گی جب تک واشنگٹن اور تہران کے درمیان مکمل معاہدہ طے نہیں پا جاتا۔
امریکی صدر نے دعویٰ کیا کہ کشیدگی کم ہونے کے بعد نیٹو نے مدد کی پیشکش کی تھی جسے انہوں نے مسترد کر دیا اور اتحاد کو ضرورت کے وقت غیر مؤثر قرار دیا۔ ایک اور پیغام میں ٹرمپ نے سعودی عرب، متحدہ عرب امارات اور قطر سمیت خلیجی ممالک کی بہادری اور تعاون پر ان کا شکریہ ادا کیا۔
یہ صورتحال 28 فروری کو ایران پر امریکی اور اسرائیلی حملوں کے بعد شروع ہونے والے 40 روزہ تنازع کے تناظر میں پیدا ہوئی۔ دشمنی کے دوران تہران نے آبنائے ہرمز بند کر کے دشمن ممالک سے منسلک تجارتی جہازوں کو خبردار کیا تھا۔ پاکستان نے 8 اپریل کو جنگ بندی کروانے میں کلیدی ثالثی کردار ادا کیا تھا جس کے بعد 11 اپریل کو اسلام آباد میں دونوں فریقین کے درمیان مذاکرات کا پہلا دور ہوا تھا۔
جنگ بندی ختم ہونے میں چند دن باقی رہ جانے کے باعث پاکستان نے ڈیڈ لائن میں توسیع کے لیے سفارتی کوششیں تیز کر دی ہیں۔ ان کوششوں کے سلسلے میں فیلڈ مارشل عاصم منیر نے حال ہی میں تہران کا دورہ کیا جس کے بعد ایران نے آبنائے ہرمز کو عارضی طور پر کھولنے کا اعلان کیا۔ صدر ٹرمپ نے مذاکرات کے حوالے سے پرامید رویہ اپناتے ہوئے کہا کہ ایران کے ساتھ بات چیت تکمیل کے قریب ہے اور زیادہ تر مسائل حل ہو چکے ہیں جس سے جلد حتمی معاہدے کی توقع ہے۔
