کینیڈا کے وزیراعظم مارک کارنی نے ایک ویڈیو پیغام میں کہا ہے کہ امریکہ کے ساتھ قریبی تعلقات جو کبھی کینیڈا کی طاقت سمجھے جاتے تھے، اب ایک کمزوری بن چکے ہیں۔ کیلگری سے جاری ہونے والے اس پیغام میں انہوں نے ان فوجی رہنماؤں کی بہادری کو خراجِ تحسین پیش کیا جنہوں نے دو صدیوں قبل امریکی جارحیت کے خلاف مزاحمت کی تھی۔
وزیراعظم نے اپنے ہاتھ میں جنرل آئزک بروک کا ایک چھوٹا کھلونا ماڈل تھام رکھا تھا، جو 1812 کی جنگ کے دوران کینیڈا کا دفاع کرتے ہوئے ہلاک ہوئے تھے۔ مارک کارنی کا کہنا تھا کہ کینیڈا اپنے پڑوسی ملک کی جانب سے پیدا کردہ خلل کو کنٹرول نہیں کر سکتا اور اب ملک اپنا مستقبل اس امید پر وابستہ نہیں رکھ سکتا کہ امریکی رویے میں اچانک بہتری آ جائے گی۔
وزیراعظم نے کہا کہ موجودہ صورتحال بظاہر منفرد لگتی ہے لیکن کینیڈا ماضی میں بھی ایسے خطرات کا کامیابی سے سامنا کر چکا ہے۔ انہوں نے چیف ٹیکمسی سمیت ان تاریخی شخصیات کا حوالہ دیا جنہوں نے امریکی توسیع پسندی کو روکنے کے لیے مقامی قبائل کو متحد کیا تھا۔
گزشتہ ہفتے اپنی لبرل حکومت کے لیے پارلیمانی اکثریت حاصل کرنے والے مارک کارنی کا کہنا ہے کہ انتخابی کامیابی انہیں امریکی صدر ڈونلڈ ٹرمپ کی جانب سے شروع کی گئی تجارتی جنگ سے نمٹنے میں مدد دے گی۔ دوسری جانب امریکی وزیر تجارت ہاورڈ لٹنک نے کینیڈا کو ایک مشکل تجارتی شراکت دار قرار دیا ہے۔
کینیڈا اپنی برآمدات کا تقریباً ستر فیصد حصہ امریکہ بھیجتا ہے اور رواں برس اسے امریکہ، میکسیکو اور کینیڈا کے مابین سہ فریقی آزاد تجارتی معاہدے پر نظرثانی کرنی ہے۔ امریکی حکام اس معاہدے میں بڑی تبدیلیاں لانے کے خواہاں ہیں۔
صدر ٹرمپ کینیڈا کی سٹیل، ایلومینیم اور آٹوز جیسی برآمدات پر محصولات عائد کرنے کے علاوہ کینیڈا کو امریکہ کی اکیاون ویں ریاست بنانے کے حوالے سے بھی بیانات دیتے رہے ہیں۔ مارک کارنی کے دفتر نے اس سوال کا جواب نہیں دیا کہ یہ ویڈیو اب کیوں جاری کی گئی اور ان شخصیات کی تعریف کیوں کی گئی جنہوں نے ماضی میں امریکی توسیع پسندی کے خلاف لڑائی لڑی تھی۔
وزیراعظم نے اعلان کیا کہ وہ آنے والے ہفتوں اور مہینوں میں باقاعدگی سے قوم سے خطاب کریں گے تاکہ انہیں معیشت کی بہتری اور ملکی خودمختاری کے دفاع کے لیے حکومتی اقدامات سے آگاہ رکھا جا سکے۔ انہوں نے اپنے عزم کا اعادہ کرتے ہوئے کہا کہ یہ ہمارا ملک اور ہمارا مستقبل ہے، ہم اپنے معاملات کا کنٹرول واپس لے رہے ہیں۔
