یورپی یونین نے ایران میں جاری جنگ اور آبنائے ہرمز کی بندش کے باعث جیٹ ایندھن کی شدید قلت سے نمٹنے کے لیے ہنگامی اقدامات شروع کر دیے ہیں۔ یورپی یونین کے انرجی کمشنر ڈین جورجنسن نے میڈرڈ میں میڈیا سے گفتگو کرتے ہوئے کہا کہ بہترین حالات میں بھی یورپی ممالک کے لیے آنے والی گرمیاں ایندھن کے بحران کے حوالے سے انتہائی مشکل ثابت ہوں گی۔
کمشنر کا کہنا تھا کہ جنگ کی وجہ سے سپلائی لائن متاثر ہونے کے پیش نظر یورپی یونین اپنے پاس موجود جیٹ ایندھن کے ذخائر کو دوبارہ تقسیم کرنے اور باہمی اشتراک سے استعمال کرنے کی حکمت عملی پر غور کر رہی ہے۔ انہوں نے واضح کیا کہ ضرورت پڑنے پر رکن ممالک کے درمیان ایندھن کی منتقلی کو یقینی بنایا جائے گا۔
یورپی ایئر لائنز نے پہلے ہی خبردار کر دیا ہے کہ ایران میں جاری جنگ کے نتیجے میں آبنائے ہرمز سے مرکزی سپلائی روٹ بند ہونے سے چند ہفتوں کے اندر جیٹ ایندھن کا بحران شدت اختیار کر سکتا ہے۔ اعداد و شمار کے مطابق یورپ اپنی جیٹ ایندھن کی ضروریات کا تقریباً 75 فیصد حصہ مشرق وسطیٰ سے درآمد کرتا ہے۔
