واشنگٹن میں امریکی صدر ڈونلڈ ٹرمپ نے تصدیق کی ہے کہ نیوی سیکریٹری جان فیلن کو ان کے عہدے سے برطرف کر دیا گیا ہے۔ اوول آفس میں میڈیا سے گفتگو کرتے ہوئے صدر ٹرمپ نے بتایا کہ فیلن کی برطرفی کی بنیادی وجہ پینٹاگون کی اعلیٰ قیادت کے ساتھ جہاز سازی کے امور پر پیدا ہونے والے اختلافات تھے۔
صدر ٹرمپ کا کہنا تھا کہ جان فیلن ایک متحرک شخصیت کے مالک تھے تاہم جہازوں کی خریداری اور تعمیر کے معاملات پر ان کے دیگر حکام کے ساتھ تنازعات پیدا ہوئے۔ امریکی صدر نے مزید کہا کہ عسکری امور میں باہمی ہم آہنگی انتہائی ضروری ہے، اور یہ حقیقت ہے کہ کچھ لوگ انہیں پسند کرتے تھے جبکہ کچھ کو ان کے کام کرنے کے انداز پر تحفظات تھے۔
خبر رساں ادارے کے مطابق جان فیلن کا شمار ان ارب پتی شخصیات میں ہوتا تھا جنہیں صدر ٹرمپ کا قریبی سمجھا جاتا تھا۔ وہ ٹرمپ کے دوبارہ اقتدار میں آنے کے بعد برطرف کیے جانے والے پہلے انتظامی سیکریٹری ہیں۔
ذرائع نے نام ظاہر نہ کرنے کی شرط پر بتایا کہ فیلن کو اس لیے ہٹایا گیا کیونکہ وہ جہاز سازی کے عمل کو تیز کرنے کی اصلاحات پر سست روی کا شکار تھے اور پینٹاگون کے اہم عہدیداروں کے ساتھ ان کے تعلقات کشیدہ ہو چکے تھے۔
پینٹاگون کی جانب سے اس تبدیلی پر تاحال کوئی باضابطہ وجہ بیان نہیں کی گئی اور نہ ہی یہ واضح کیا گیا ہے کہ یہ استعفیٰ تھا یا برطرفی۔ یہ واقعہ ایسے وقت میں پیش آیا ہے جب ایران کے ساتھ کشیدہ جنگ بندی کے تناظر میں امریکہ مشرق وسطیٰ میں اپنے بحری اثاثوں کی تعداد میں اضافہ کر رہا ہے۔ پینٹاگون میں جاری حالیہ تبدیلیاں جنگی صورتحال کے پیش نظر انتہائی اہم سمجھی جا رہی ہیں۔
