صدر ڈونلڈ ٹرمپ نے منگل کے روز ایک سماجی رابطے کی ویب سائٹ پر جاری بیان میں دعوی کیا ہے کہ ایران کی جانب سے انہیں آگاہ کیا گیا ہے کہ ملک اس وقت تباہی کے دہانے پر ہے اور اپنی قیادت کے معاملات کو سنبھالنے کے لیے امریکہ سے آبنائے ہرمز کو کھولنے کا مطالبہ کر رہا ہے۔
ٹرمپ نے اپنی پوسٹ میں لکھا کہ ایران نے ہمیں مطلع کیا ہے کہ وہ تباہی کی حالت میں ہیں اور چاہتے ہیں کہ ہم جلد از جلد آبنائے ہرمز کو کھول دیں تاکہ وہ اپنی قیادت کے بحران کو حل کر سکیں۔ انہوں نے مزید کہا کہ انہیں یقین ہے کہ ایران اس صورتحال سے نمٹنے میں کامیاب ہو جائے گا۔
تاہم صدر ٹرمپ کی جانب سے یہ واضح نہیں کیا گیا کہ ایران نے یہ پیغام کس ذریعے سے پہنچایا ہے اور نہ ہی تہران کی جانب سے اس دعوے پر فوری طور پر کوئی ردعمل سامنے آیا ہے۔ وائٹ ہاؤس نے بھی اس معاملے پر تبصرہ کرنے کی درخواست کا فوری جواب نہیں دیا۔
دریں اثنا ایک امریکی عہدیدار نے خبر رساں ادارے رائٹرز کو بتایا ہے کہ صدر ٹرمپ دو ماہ سے جاری جنگ کے خاتمے کے لیے ایران کی حالیہ تجاویز سے مطمئن نہیں ہیں۔ اس پیشرفت نے تنازع کے حل کی امیدوں کو مزید دھندلا دیا ہے جبکہ اس جنگ کے باعث توانائی کی ترسیل متاثر ہونے کے ساتھ ساتھ افراط زر میں اضافہ ہوا ہے اور ہزاروں افراد اپنی جانوں سے ہاتھ دھو بیٹھے ہیں۔
