متحدہ عرب امارات کے صدر شیخ محمد بن زاید النہیان اور سویڈن کے وزیراعظم الف کرسٹرسن کے درمیان ٹیلی فونک رابطہ ہوا ہے جس میں دوطرفہ تعلقات اور باہمی تعاون کے فروغ پر تبادلہ خیال کیا گیا۔
دونوں رہنماؤں نے معیشت، قابل تجدید توانائی، پائیداری، ٹیکنالوجی اور مصنوعی ذہانت کے شعبوں میں تعاون بڑھانے پر اتفاق کیا۔ یہ شعبے دونوں ممالک کی ترقیاتی ترجیحات میں مرکزی حیثیت رکھتے ہیں۔
گفتگو کے دوران شیخ محمد بن زاید اور وزیراعظم الف کرسٹرسن نے باہمی مفادات کے تحت ترقیاتی شراکت داری کو مزید مستحکم کرنے کے عزم کا اعادہ کیا۔ ان کا کہنا تھا کہ ان شعبوں میں تعاون سے نہ صرف دوطرفہ تعلقات گہرے ہوں گے بلکہ پائیدار ترقی اور معاشی خوشحالی کے اہداف کے حصول میں بھی مدد ملے گی۔
ٹیلی فونک رابطے میں مشرق وسطیٰ کی بدلتی ہوئی صورتحال پر بھی غور کیا گیا۔ دونوں رہنماؤں نے خطے میں حالیہ پیش رفت اور اس کے بین الاقوامی امن و سلامتی، سمندری گزرگاہوں، توانائی کی فراہمی اور عالمی معیشت پر پڑنے والے اثرات کا جائزہ لیا۔
یہ اعلیٰ سطحی سفارتی رابطہ ایسے وقت میں ہوا ہے جب عالمی سطح پر سیکیورٹی، تجارت، توانائی اور سپلائی چین کے امور پر توجہ مرکوز ہے۔ دونوں رہنماؤں نے اس بات پر زور دیا کہ موجودہ عالمی تناظر میں یو اے ای اور سویڈن کے درمیان قریبی روابط خطے کے استحکام کے لیے انتہائی اہمیت کے حامل ہیں۔
