غزہ کی سمندری ناکہ بندی توڑنے کی کوشش کرنے والے گلوبل صمود فلوٹیلا کے 22 جہازوں کو اسرائیلی بحریہ نے یونان کے جزیرے کریٹ کے قریب روک کر عملے کو حراست میں لے لیا ہے۔ تنظیم کا دعوی ہے کہ اسرائیلی افواج نے ان کے جہازوں کو اغوا کیا اور کارروائی کے دوران کشتیوں کے انجن اور نیویگیشن سسٹم کو تباہ کر دیا، جس کے بعد سینکڑوں شہریوں کو سمندر میں طوفان کے سامنے بے یارومددگار چھوڑ دیا گیا۔
گلوبل صمود فلوٹیلا نے اس واقعے کو کھلی سمندری دہشت گردی قرار دیا ہے۔ تنظیم کا کہنا ہے کہ اسرائیل اپنی سرحدوں سے دور بین الاقوامی پانیوں میں بلا امتیاز کارروائی کر رہا ہے اور اسے کسی قسم کا کوئی خوف نہیں ہے۔ سوشل میڈیا پر جاری کردہ سی سی ٹی وی فوٹیج میں دیکھا جا سکتا ہے کہ اسرائیلی اہلکار بندوق کے زور پر کارکنوں کو ہاتھوں کو سر پر رکھنے کا حکم دے رہے ہیں۔
دوسری جانب اسرائیلی وزارت خارجہ نے ان الزامات کو مسترد کرتے ہوئے اسے ایک تشہیری ڈرامہ قرار دیا ہے۔ اسرائیلی حکام کا کہنا ہے کہ 20 سے زائد کشتیوں پر سوار تقریباً 175 کارکنوں کو پرامن طریقے سے اسرائیل لایا جا رہا ہے۔ اسرائیل نے ان کارکنوں کو پیشہ ور اشتعال انگیز قرار دیتے ہوئے دعوی کیا ہے کہ یہ محض تفریحی سفر ہے۔
گلوبل صمود فلوٹیلا کے مطابق اگرچہ 22 کشتیوں کو روک لیا گیا ہے، لیکن مزید 36 کشتیاں اب بھی غزہ کی جانب رواں دواں ہیں۔ گزشتہ اکتوبر میں بھی اسرائیل نے اسی تنظیم کے فلوٹیلا کو روکا تھا اور گریٹا تھنبرگ سمیت 470 سے زائد افراد کو گرفتار کر کے ملک بدر کر دیا تھا۔
اقوام متحدہ کی فلسطین کے لیے کام کرنے والی ایجنسی نے اپنی حالیہ رپورٹ میں خبردار کیا ہے کہ غزہ میں اسرائیلی فضائی حملوں اور گولہ باری کا سلسلہ جاری ہے، جس سے انسانی بحران سنگین ہو چکا ہے۔ رپورٹ کے مطابق بے گھر افراد کے کیمپوں میں صفائی کے ناقص انتظامات اور پانی کی قلت کے باعث وبائی امراض تیزی سے پھیل رہے ہیں۔ ریڈ کراس کے اعداد و شمار کے مطابق اسرائیل حماس جنگ کے دوران اب تک کم از کم 72 ہزار 562 فلسطینی اور 2 ہزار سے زائد اسرائیلی ہلاک ہو چکے ہیں، جبکہ غزہ کی 90 فیصد آبادی بے گھر ہو چکی ہے۔
