چین کے قومی ریلوے نیٹ ورک نے یکم مئی کو دو کروڑ اڑتالیس لاکھ مسافروں کو ان کی منزلوں تک پہنچا کر ایک نیا تاریخی ریکارڈ قائم کر دیا ہے۔ چائنا اسٹیٹ ریلوے گروپ کے جاری کردہ اعداد و شمار کے مطابق یہ ایک ہی دن میں سفر کرنے والے مسافروں کی اب تک کی سب سے بڑی تعداد ہے۔
سرکاری خبر رساں ادارے ژنہوا کی رپورٹ کے مطابق قومی ریلوے نظام دو مئی کو بھی ایک کروڑ ستانوے لاکھ مسافروں کو سفر کی سہولت فراہم کرے گا۔ تعطیلات کے دوران مسافروں کے غیر معمولی رش کو سنبھالنے کے لیے انتظامیہ نے متعدد روٹس پر اضافی ٹرینیں چلانے کا فیصلہ کیا ہے۔
رپورٹ کے مطابق ژینگ زو لائن پر ایک سو چالیس جبکہ چینگ دو لائن پر ایک سو چوراسی اضافی مسافر ٹرینیں شامل کی گئی ہیں۔
چین کا سیاحتی شعبہ ملکی معیشت کے لیے ایک مثبت پہلو کے طور پر ابھرا ہے۔ ماہرین کا کہنا ہے کہ یہ پیش رفت ایسے وقت میں قومی معیشت کو نئی تحریک فراہم کر رہی ہے جب ملک کو کمزور کھپت اور جائیداد کے شعبے میں طویل عرصے سے جاری مندی جیسے چیلنجز کا سامنا ہے۔
