کولمبیا کے صوبے کنڈی نامارکا میں واقع کوئلے کی ایک کان میں دھماکے کے نتیجے میں نو کان کن ہلاک اور چھ زخمی ہو گئے۔ قومی کان کنی ایجنسی کے مطابق یہ افسوسناک واقعہ لا سسکوڈا کان میں پیش آیا جسے کاربونیرا لوس پینوس نامی کمپنی چلاتی ہے۔
حکام کا کہنا ہے کہ ابتدائی تحقیقات کے مطابق دھماکہ گیسوں کے اخراج اور اجتماع کے باعث ہوا۔ ایجنسی نے انکشاف کیا کہ نو اپریل کو کیے گئے دورے کے دوران کان میں میتھین سمیت خطرناک گیسوں کی موجودگی کی نشاندہی کی گئی تھی اور کمپنی کو حفاظتی اقدامات سخت کرنے کی تنبیہ کی گئی تھی۔
قومی کان کنی ایجنسی نے جاری بیان میں کہا کہ کوئلے کے ذخائر میں میتھین گیس اور کوئلے کی دھول کا اجتماع انتہائی خطرناک ثابت ہو سکتا ہے۔ ایجنسی نے خبردار کیا تھا کہ ایسے حالات میں احتیاطی تدابیر کا فقدان بڑے حادثے کا سبب بن سکتا ہے۔
واقعے کے بعد امدادی کارروائیوں کے دوران چھ زخمیوں کو نکال کر قریبی ہسپتال منتقل کر دیا گیا جہاں انہیں طبی امداد فراہم کی جا رہی ہے۔ کان چلانے والی کمپنی کی جانب سے تاحال اس معاملے پر کوئی موقف سامنے نہیں آیا ہے۔
کولمبیا میں کوئلے اور سونے کی کانوں میں حادثات ایک معمول بن چکے ہیں، خاص طور پر ان مقامات پر جہاں حفاظتی معیارات کا خیال نہیں رکھا جاتا یا کان کنی غیر قانونی طور پر کی جاتی ہے۔
