واشنگٹن میں امریکی عدالت نے بدنام زمانہ مجرم جیفری ایپسٹین کی جانب سے تحریر کردہ مبینہ خودکشی کا نوٹ جاری کر دیا ہے۔ یہ تحریر اگست 2019 میں جیل میں ہونے والی ان کی موت سے چند ہفتے قبل لکھی گئی تھی۔
ایپسٹین کے سیل میٹ نے انکشاف کیا ہے کہ یہ خط جولائی 2019 میں جیفری ایپسٹین کی جانب سے کی گئی خودکشی کی ناکام کوشش کے بعد ایک کتاب سے ملا تھا۔ امریکی ڈسٹرکٹ کورٹ برائے سدرن نیویارک کے جج کینتھ کاراس نے نیویارک ٹائمز کی درخواست پر یہ دستاویز منظر عام پر لانے کا حکم دیا۔
خط کے متن میں ایپسٹین نے لکھا ہے کہ حکام نے مہینوں تک ان کی تفتیش کی لیکن کچھ حاصل نہ کر سکے۔ خط میں مزید لکھا ہے کہ الوداع کہنے کے لیے اپنے وقت کا انتخاب کرنا ایک نعمت ہے۔ تحریر کے آخر میں یہ الفاظ درج ہیں کہ کیا آپ چاہتے ہیں کہ میں رو دوں، یہ بالکل بھی ٹھیک نہیں اور اس کے قابل نہیں ہے۔
اگرچہ اس دستاویز کی باضابطہ تصدیق نہیں کی گئی ہے تاہم اس کا اجرا ایسے وقت میں ہوا ہے جب جیفری ایپسٹین کی جیل میں پراسرار موت کے حوالے سے سوالات تاحال برقرار ہیں۔ سرکاری طور پر ان کی موت کو خودکشی قرار دیا گیا تھا تاہم جیل کے سیکیورٹی نظام میں کوتاہیوں اور سی سی ٹی وی فوٹیج غائب ہونے کے باعث اس واقعے پر شکوک و شبہات پائے جاتے ہیں۔
جیفری ایپسٹین جنسی اسمگلنگ کے الزامات کا سامنا کر رہے تھے اور ان کی موت کے بعد سے یہ معاملہ امریکی اور برطانوی سیاست میں مسلسل موضوع بحث رہا ہے۔ حال ہی میں ان کی زندگی اور تحقیقات سے متعلق متعدد دستاویزات بھی جاری کی گئی ہیں۔
