نیویارک میں ایک امریکی ٹرانسپیرنسی گروپ نے ایک عارضی نمائش کا اہتمام کیا ہے جس میں جیفری ایپسٹین سے متعلق امریکی محکمہ انصاف کی جانب سے جاری کردہ تمام دستاویزات کو عوام کے سامنے پیش کیا گیا ہے۔ یہ نمائش ساڑھے 3 ملین صفحات پر مشتمل ہے جنہیں 3 ہزار 437 جلدوں میں ترتیب دے کر الماریوں میں سجایا گیا ہے۔
اس لائبریری کو ڈونلڈ جے ٹرمپ اینڈ جیفری ایپسٹین میموریل ریڈنگ روم کا نام دیا گیا ہے۔ واشنگٹن میں قائم غیر منافع بخش ادارے انسٹی ٹیوٹ آف پرائمری فیکٹس کے مطابق جب سچائی کو پرنٹ کر کے کتابی شکل میں سامنے لایا جاتا ہے تو اس کا انکار کرنا مشکل ہو جاتا ہے۔
تاہم محکمہ انصاف کی جانب سے دستاویزات میں کچھ متاثرین کے ناموں کو چھپانے میں ناکامی کے باعث عام شہریوں کو ان فائلوں تک رسائی کی اجازت نہیں ہے۔ اس نمائش میں صرف صحافیوں اور وکلاء جیسے پیشہ ور افراد کو ہی استثنائی طور پر دستاویزات دیکھنے کی اجازت دی گئی ہے۔
اس عارضی نمائش میں سابق صدر ڈونلڈ ٹرمپ اور جیفری ایپسٹین کے درمیان دیرینہ تعلقات پر مبنی ایک خصوصی ڈسپلے بھی رکھا گیا ہے۔ جیفری ایپسٹین نابالغوں کی اسمگلنگ کے الزامات کا سامنا کرنے کے دوران 2019 میں وفاقی حراست میں انتقال کر گئے تھے۔
منصوبے کے تخلیق کاروں میں شامل ڈیوڈ گیریٹ کا کہنا ہے کہ ٹرمپ انتظامیہ کی جانب سے دستاویزات جاری کرنے کے عمل پر عوامی سطح پر سخت ردعمل کی ضرورت ہے۔ ناقدین کا الزام ہے کہ حکام ٹرمپ اور ایپسٹین کے گہرے روابط کو چھپانے کی کوشش کر رہے ہیں۔
