ایران اور اسرائیل کے درمیان کشیدگی کے بعد ایرانی سرزمین سے پاکستانی شہریوں کی وطن واپسی کا عمل اٹھارویں روز بھی جاری رہا۔ اب تک مجموعی طور پر پانچ ہزار آٹھ سو نواسی پاکستانی شہری بحفاظت وطن پہنچ چکے ہیں۔
ضلعی انتظامیہ کے حکام کے مطابق گزشتہ اٹھارہ روز کے دوران تفتان اور گبد رمدان بارڈر کے ذریعے پاکستانیوں کی واپسی کا سلسلہ بلا تعطل جاری ہے۔ آج مزید سینتیس افراد وطن واپس پہنچے ہیں۔
تفتان بارڈر کے راستے آج چار پاکستانی شہری وطن پہنچے، جس کے بعد اس سرحدی گزرگاہ سے واپس آنے والوں کی کل تعداد تین ہزار سات سو اٹھاسی ہوگئی ہے۔
دوسری جانب گبد رمدان بارڈر کے ذریعے آج تینتیس افراد نے وطن میں قدم رکھا۔ اس سرحدی راستے سے اب تک واپس آنے والے پاکستانیوں کی مجموعی تعداد دو ہزار ایک سو ایک تک پہنچ چکی ہے۔
ضلعی انتظامیہ کا کہنا ہے کہ اٹھائیس فروری سے شروع ہونے والے اس عمل میں زائرین، مزدور، طلبا اور تاجروں سمیت کل پانچ ہزار آٹھ سو نواسی پاکستانی تفتان اور گبد رمدان بارڈر کے راستے وطن واپس آ چکے ہیں۔
