پاکستان پیپلز پارٹی کی سینیٹر شیری رحمان کی صاحبزادی مروی ملک انتقال کر گئیں۔ پارٹی سیکریٹریٹ کے مطابق مروی ملک کچھ روز قبل برین ہیمرج کا شکار ہوئی تھیں جس کے بعد وہ جانبر نہ ہو سکیں۔
مرحومہ کی نماز جنازہ پیر کے روز سہ پہر ساڑھے تین بجے ڈی ایچ اے فیز 8 کراچی میں ادا کی جائے گی۔
صدر مملکت آصف علی زرداری نے مروی ملک کے انتقال پر گہرے دکھ اور افسوس کا اظہار کیا ہے۔ صدر نے سوگوار خاندان سے تعزیت کرتے ہوئے دعا کی کہ اللہ تعالیٰ لواحقین کو صبر جمیل عطا فرمائے۔
پیپلز پارٹی کی رہنما شازیہ مری نے بھی واقعے پر گہرے رنج و غم کا اظہار کرتے ہوئے اسے انتہائی تکلیف دہ قرار دیا۔
گورنر خیبر پختونخوا فیصل کریم کنڈی نے بھی شیری رحمان اور ان کے اہل خانہ سے دلی تعزیت کا اظہار کیا اور اس سانحے کو ناقابل تلافی نقصان قرار دیا۔
سیاسی و سماجی حلقوں کی جانب سے بھی مروی ملک کے انتقال پر گہرے افسوس کا اظہار کیا گیا ہے اور دعائے مغفرت کی گئی ہے۔
