وزیر اعظم شہباز شریف نے کہا ہے کہ پاکستان اور ترکیہ کے مابین صدیوں پر محیط برادرانہ تعلقات اب ایک جامع اقتصادی شراکت داری میں تبدیل ہو رہے ہیں۔ یہ بات انہوں نے ترکیہ کی آئینی عدالت کے صدر قادر اوزکایا اور ان کے وفد سے ملاقات کے دوران کہی۔
وزیر اعظم نے اس بات پر زور دیا کہ دونوں ممالک شہریوں کو فوری انصاف کی فراہمی کے لیے ایک دوسرے کے تجربات سے استفادہ کر سکتے ہیں۔ انہوں نے کہا کہ حالیہ دورے کے دوران طے پانے والا مفاہمت کی یادداشت کا معاہدہ اس سمت میں پہلا قدم ہے، جس کے تحت عدالتی امور میں جدید ڈیجیٹل ٹیکنالوجی کے استعمال کے لیے معلومات کا تبادلہ کیا جائے گا۔
شہباز شریف نے مزید کہا کہ پاکستان اور ترکیہ ماحولیاتی تبدیلیوں، انسداد دہشت گردی، امیگریشن اور نفاذ قانون جیسے اہم شعبوں میں بھی تعاون کو فروغ دے سکتے ہیں۔
ترک آئینی عدالت کے صدر قادر اوزکایا نے پرتپاک استقبال پر شکریہ ادا کرتے ہوئے کہا کہ ترک عوام کے دلوں میں پاکستانیوں کے لیے گہری محبت موجود ہے۔ انہوں نے اعلان کیا کہ ترکیہ کی 64 سالہ قدیم آئینی عدالت پاکستان کے ساتھ علم کے تبادلے کے لیے ایک پائلٹ پروجیکٹ شروع کرنے کے لیے تیار ہے۔
ملاقات میں ترک آئینی عدالت کے ججز رضوان گولش اور رضا اکیال، پاکستان میں ترکیہ کے سفیر عرفان نذیر اوغلو کے علاوہ نائب وزیر اعظم و وزیر خارجہ اسحاق ڈار، وزیر قانون اعظم نذیر تارڑ، اٹارنی جنرل منصور اعوان، وزیر مملکت بیرسٹر عقیل ملک اور معاون خصوصی طارق فاطمی بھی شریک تھے۔
