ضلع نارووال کی تحصیل شکرگڑھ میں دریائے راوی کے قریب مچھلی پکڑنے کے دوران دو افراد ڈوب گئے، جن میں سے ایک کی لاش نکال لی گئی جبکہ دوسرے کی تلاش جاری ہے۔
واقعہ جمعرات کی شام کرتار پور کے نزدیک پیش آیا۔ اطلاع ملتے ہی ریسکیو ٹیمیں فوری طور پر جائے وقوعہ پر پہنچ گئیں۔ امدادی کارروائیوں کے دوران 45 سالہ شخص کی لاش کو دریا سے نکال لیا گیا ہے۔
ریسکیو حکام کے مطابق ڈوبنے والا 12 سالہ لڑکا تاحال لاپتہ ہے۔ دونوں افراد دریائے راوی کے کنارے مچھلی پکڑنے میں مصروف تھے کہ اچانک گہرے پانی میں جا گرے۔
ریسکیو ٹیموں کی جانب سے لاپتہ بچے کی بازیابی کے لیے آپریشن تاحال جاری ہے۔ علاقے میں سوگ کی فضا ہے اور مقامی انتظامیہ بھی صورتحال کی نگرانی کر رہی ہے۔
