ایرانی پارلیمنٹ کے اسپیکر محمد باقر قالیباف نے کہا ہے کہ دشمن ایران کے اتحاد کو پارہ پارہ کر کے اسے ہتھیار ڈالنے پر مجبور کرنا چاہتا ہے۔ قوم کے نام اپنے پیغام میں انہوں نے خبردار کیا کہ دشمن ملک کو غیر مستحکم کرنے کے لیے بحری ناکہ بندی، معاشی دباؤ اور میڈیا پروپیگنڈے پر مشتمل نئی حکمت عملی اپنا رہا ہے۔
اسپیکر قالیباف کے مطابق ان اقدامات کا بنیادی مقصد قومی یکجہتی کو کمزور کرنا ہے تاکہ ایران کو گھٹنے ٹیکنے پر مجبور کیا جا سکے۔ انہوں نے واضح کیا کہ اس صورتحال میں فوجی جارحیت، بالخصوص دہشت گردانہ حملوں کے امکان کو بھی نظر انداز نہیں کیا جا سکتا۔
ان کا کہنا تھا کہ یہ جارحانہ طرز عمل دراصل ایرانی معاشرے کو اندر سے کھوکھلا کرنے کی ایک وسیع سازش کا حصہ ہے۔ انہوں نے زور دیا کہ تمام تر معاشی مشکلات کے باوجود ایرانی عوام اپنی آزادی، وقار، عقائد اور نظریات کے تحفظ کے لیے پرعزم ہیں۔
محمد باقر قالیباف نے مزید کہا کہ قوم موجودہ دور کی حساسیت سے بخوبی آگاہ ہے اور اسے ایسے دشمن کے سامنے ڈٹ کر کھڑا ہونا ہوگا جو یہ غلط فہمی پالے ہوئے ہے کہ وہ ایرانی تہذیب کو کمزور کرنے میں کامیاب ہو جائے گا۔
