نائب وزیراعظم اور وزیر خارجہ اسحاق ڈار نے کہا ہے کہ خطے میں جاری کشیدگی عالمی توانائی کے بحران کا سبب بنی ہے۔ لاہور میں فیوچر آف فنانس سمٹ 2026 سے خطاب کرتے ہوئے انہوں نے کہا کہ پاکستان نے تیسری عالمی جنگ کو روکنے میں کلیدی کردار ادا کیا ہے۔
اسحاق ڈار نے دعویٰ کیا کہ وزیراعظم شہباز شریف اور فیلڈ مارشل عاصم منیر کی قیادت میں ایران اور امریکہ 47 سال بعد مذاکرات پر آمادہ ہوئے۔ انہوں نے کہا کہ یہ سمٹ جنوبی ایشیا میں گڈ گورننس، شفافیت اور مضبوط اداروں کے فروغ میں مددگار ثابت ہوگی۔
نائب وزیراعظم کا کہنا تھا کہ معاشی استحکام کا دارومدار اصلاحات پر ہے اور جدید ٹیکنالوجی تمام شعبوں میں انقلابی تبدیلیاں لا رہی ہے۔ انہوں نے کہا کہ حکومت وزیراعظم کی قیادت میں ایک جامع اصلاحاتی ایجنڈے پر عمل پیرا ہے جس سے پائیدار ترقی کو یقینی بنایا جا سکتا ہے۔
اسحاق ڈار نے مزید کہا کہ حکومتی اقدامات کے نتیجے میں پاکستان میں سرمایہ کاروں کا اعتماد بحال ہوا ہے۔ انہوں نے کہا کہ منصوبہ بندی اور شفافیت ہی ترقی کی ضمانت ہے۔
