کینیڈا میں تعینات پاکستانی ہائی کمیشن اور ٹورنٹو، مونٹریال اور وینکوور میں واقع قونصل خانوں میں معرکہ حق کی پہلی سالگرہ انتہائی جوش و خروش کے ساتھ منائی گئی۔ اس موقع پر منعقدہ تقریبات میں پاکستان کی مسلح افواج کی پیشہ ورانہ مہارت اور بے مثال بہادری کو زبردست خراج تحسین پیش کیا گیا۔
تقریبات کے دوران اس عزم کا اعادہ کیا گیا کہ پاکستان نے آپریشن بنیان مرصوص کے ذریعے بھارتی جارحیت کو مسترد کر کے اپنی خودمختاری کا بھرپور دفاع کیا۔ پاکستانی فورسز نے دشمن کے مذموم عزائم کے سامنے سیسہ پلائی دیوار بن کر بھارتی جارحانہ عزائم کو خاک میں ملا دیا۔
اوٹاوا میں ہائی کمیشن کی عمارت میں منعقدہ تقریب میں پاکستانی تارکین وطن اور پاکستان کے خیر خواہوں نے بڑی تعداد میں شرکت کی۔ اس موقع پر شہدائے وطن کے درجات کی بلندی کے لیے خصوصی دعائیں مانگی گئیں۔
ہائی کمشنر محمد سلیم نے شرکاء سے خطاب کرتے ہوئے کہا کہ پوری قوم نے ملکی قیادت اور بہادر مسلح افواج کی زیر قیادت بھارتی جارحیت کا جس عزم و استقامت سے مقابلہ کیا وہ لائق تحسین ہے۔
ہائی کمشنر نے پاکستان کے تحمل اور ذمہ دارانہ ردعمل کو اجاگر کرتے ہوئے ان دوست ممالک کا شکریہ ادا کیا جنہوں نے خطے میں کشیدگی کم کرنے میں اپنا کردار ادا کیا۔ انہوں نے زور دیا کہ پاکستان اور بھارت کے درمیان تنازع جموں و کشمیر کا حل اقوام متحدہ کی سلامتی کونسل کی قراردادوں اور کشمیری عوام کی امنگوں کے مطابق بات چیت کے ذریعے ہی ممکن ہے۔
