پاکستان اور دنیا کے دیگر ممالک میں آباد پاکستانیوں کی طرح کینیڈا میں آباد تارکین وطن نے یوم پاکستان کو بھرپور انداز سے منانے کے لیے مختلف تقریبات کا اہتمام کیا۔
ایک بڑی تقریب کینیڈین دارالحکومت میں قائم پاکستان ہائی کمیشن منعقد ہوئی جہاں پر قومی ترانے کی دھن میں پرچم کشائی کا اہتمام کیا گیا اور یوم پاکستان کی مناسبت سے صدر پاکستان اور وزیر اعظم پاکستان کے پیغامات پڑھ کر سنائے گئے۔تقریب سے خطاب کرتے ہوئے کینیڈا میں پاکستان کے قائم مقام ہائی کمشنر شہباز ملک نے یوم پاکستان کی تاریخی اہمیت پر روشنی ڈالی اور بانیان پاکستان کی ولولہ انگیز قیادت اور راہنمائی تلے تحریک پاکستان کے آغاز اور برصغیر کے لاکھوں مسلمانوں کی قربانیوں کے نتیجے میں ایک آزاد وطن پاکستان کے قیام کے مختلف پہلوؤں کا تذکرہ کیا۔
تقریب میں کینیڈین سینٹ کی پاکستان نژاد رکن سلمی عطا اللہ جان لے علاوہ کینیڈین سینیٹر محمد اقبال روالیہ اور سینیٹر وکٹر اوہو نے شرکت کی۔اس موقع پر صدر پاکستان کی جانب سے سینیٹر سلمی عطا اللہ جان کو ستارہ پاکستان کا سویلین ایوارڈ بھی عطا کیا گیا۔
اٹاوہ میں یوم پاکستان کی مناسبت سے ایک اور تقریب کا اہتمام سلام پاکستان کینیڈا نے کیا جس میں اٹاوا شہر کے میئر جم واٹسن، کونسلر ایلی الشنتیری، کینیڈین رکن پارلیمان چندرا آریا اور پاکستان نژاد رکن پارلیمنٹ پال چیانگ نے شرکت کی اور یوم پاکستان کی اہمیت کےعلاوہ پاکستان اور کینیڈا کے سفارتی تعلقات کے پچھتر سال مکمل ہونے پر دونوں ممالک کے درمیان گرمجوشانہ تعلقات کو مزید آگے بڑھانے کی ضرورت پر زور دیا۔
تقریب میں پاکستان ہائی کمیشن کی قونصلر عطیہ اقبال اور قونصلر پریس حامدرضا وٹو نے بھی شرکت کی۔
علاوہ ازیں یوم پاکستان کی مناسبت سے ٹورنٹو،وینکوور اور مانٹریال میں قائم پاکستانی قونصل خانوں میں بھی پرچم کشائی کی تقریبات کا اہتمام کیا گیا جس میں پاکستانی کینیڈینز کی ایک بڑی تعداد نے شرکت کی۔
ان تقریبات کے علاوہ پاکستان کے قائم مقام ہائی کمشنر شہباز ملک نے کینیڈا پاکستان پارلیمنٹری فرینڈشپ گروپ کے ارکان کے لیے اپنی رہائش گاہ پر ایک عشائیے کا اہتمام کیا جس میں لگ بھگ دو درجن ارکان پارلیمنٹ شریک ہوئے۔ان میں وزارت امیگریشن، مہاجرین اور شہریت کی پارلیمانی سیکرٹری میری فرانس لا لونڈ کے علاوہ پاکستان نژاد ارکان پارلیمنٹ سلمی زاہد، سلمی عطا اللہ جان، شفقت علی، یاسر نقوی، سمیر زبیری اور پال چیانگ بھی شریک ہوئے۔
