سکیورٹیز اینڈ ایکسچینج کمیشن آف پاکستان نے نان بینکنگ فنانشل سیکٹر میں دیجٹلائزیشن کے فروغ اور میوچل فنڈز میں سرمایہ کاروں کی شمولیت کو آسان اور سہل بنانے کے پیش نظر میوچل فنڈز ڈیجیٹل پلیٹ فارم کی تشکیل کے لئے ریگولیٹری گائیڈ لائنز جاری کر دی ہیں۔ یہ گائیڈ لائنز ایس ای سی پی کی ویب سائٹ پر دستیاب ہیں۔
میوچل فنڈ زکی ڈسٹری بیوشن کے لئے ڈیجیٹل پلیٹ فارم سرمایہ کاروں، فنانشل ایڈوائزرز اور ویلتھ مینجرز کو مختلف مالیاتی پراڈکٹ کی رٹیل میں شفاف اور سہل خریداری اور سرمایہ کاری کے لئے وسیع رینج فراہم کرتا ہے ۔ اس ڈیجیٹل پلیٹ فارم پر سرمایہ کار اپنی رسک پروفائل اور سرمایہ کاری کے مقاصد کے مطابق اپنی سرمایہ کاری ترتیب دے سکتے ہیں۔
ایس ای سی پی کی جانب سے ملک کے پہلےمیوچل فنڈز کے ڈیجیٹل ڈسٹری بیوشن پلیٹ فارم کو لائسنس جاری کیا جا چکا ہے جو کہ جلد ہی اپنی آن لائن سروسز کی فراہمی شروع کر دے گا۔ اس کے علاوہ ایس ای سی پی کے ریگولیٹری سینڈ بکس کے پہلے مرحلے میں منتخب کی گئی دو کمپنیاں کے ڈیجیٹل پلیٹ فارم کی ٹیسٹنگ کی حتمی مرحلے میں ہیں۔ مختلف مالیاتی پراڈکٹ کے لئے ایسے ڈیجیٹل پلیٹ فارمز کی دستیابی سے ملک میں مالیاتی شمولیت کو فروغ دیا جا سکتا ہے جبکہ عوام کو سرمایہ کاری کے محفوظ اور سہل مواقع دستیاب ہوں گے۔
ایس ای سی پی کی جانب سے میوچل فنڈز کے ڈیجیٹل پلیٹ فارم کی گائیڈ لائنز میں ، پلیٹ فارم کے ڈیزائن ، بنیادی اصول، معلومات کی دستیابی ، سرمایہ کاری سے منسلک رسک کی تفصیلات اور رسک مینجمنٹ کے لئے رہنمائی ، پلیٹ فارم کی بہترین مینجمنٹ کے اصول ، صارفین کی پروفائلنگ، کمپنی اور صارف کے کنڈکٹ، سسٹم کی سکیورٹی ، مالیاتی یونٹ کے اجراء، یونٹ کی ڈیجیٹل ڈسٹری بیوشن اور فنڈز کی آن لائن ریڈیمشن اور شکایات کے ازالہ کے قوائد و ضوابط دئے گئے ہیں۔ ڈیجیٹل ڈسٹری بیوشن پلیٹ فارمز، میوچل فنڈز کے لئے ون سٹاپ شاپ کی سہولت فراہم کریں گے جہاں سرمایہ کار شفاف طریق سے فوری آن لائن انوسٹمنٹ کر سکیں گے اور اپنے آن لائن اکاوئنٹ کے ذریعے اپنی سرمایہ کاری کو خود مینج بھی کر سکیں گے۔
